Al-Hussein dezisti, eleitu fali Blatter

Suisu diriji FIFA, nebe hasoru daudaun problema ho detensaun no eskándalu sira korupsaun nian.


 

Blatter la mana'an votu dahuluk, maibé besik tiha - hela de'it votu hitu hodi mana'an. Hafoin ne'e, Al Bin Al-Hussein fó sai katak nia dezisti - nia agradese ona apoiu no korajen hosi ema sira nebe vota ona iha nia no sai tiha hodi eleisaun.

 

Bainhira buat hotu hatudu ba volta daruak hodi mana'an prezidénsia FIFA nian, maka Al Bin Al-Hussein dezisti. Joseph Blatter agradese ona nia adversáriu nia hahalok no mós se maka vota ona iha nia. No promete ona "FIFA ida nebe maka'as liu" iha nia mandatu nia rohan iha tinan 2019.

 

Iha volta dahuluk, Blatter hetan votu 133 hasoru Al-Hussein ho votu 73, la eleitu fali tanba de'it falta votu hitu. Nune'e, estatutu sira hosi Federasaun Internasionál Futeból nian eziji baluk rua hosi votu 209 nebe harii koléjiu eleitorál, hodi nune'e bele hili prezidente ida iha kedas volta dahuluk ka ho votu 140.

 

Iha diskursu badak, Blatter hahú kumprimenta nia adversáriu, hodi rekoñese katak Al Bin Al-Hussein bele konkista liu votu sira karik avansa ba volta daruak. No la ko'alia tan kona-bá nia adversáriu.

 

Nia rekoñese katak FIFA iha "problema organizasionál sira" iha nível Komité Ezekutivu nebe tenki "konsege reprezentasaun di'ak ida hosi konfederasaun oioin". "No ami presiza feto sira iha Komité ne'e. Ami labele kontinua hili de'it sira", nia hatutan.

 

Prezidente nebe eleitu fali asumi mós responsabilidade hodi "lori fila fali FIFA" no hatete ba kongresu dala 65, nebe halibur iha Zurique, iha Suisa, katak nia fiar katak bainhira hamutuk "bele konsege halo". "Ita tenki serbisu hamutuk", nia hatutan.

 

"Tinan sei la sai hanesan problema ida. Ha'u bele garanti", Blatter, ho tinan 79, hatete. "Ha'u koñese ema sira ho tinan 50 nebe hanesan katuas", nia hatutan hodi husu deskulpa ba delegadu sira: "Ha'u la hatene katak iha ne'e iha ema barak ho tinan 50", nia hatete ho halimar.

 

"Ha'u la'ós perfeitu. Laiha ema ida maka perfeitu. Maibe ha'u fiar katak hamutuk ita bele halo serbisu di'ak ida", Blatter hakotu.

 

ho Expresso