Sexta-feira, 13.10.17

Simone: "Messi iha kalan ida ne'ebé ema arjentinu sira husu no hakarak"

Ho hat-trick ida, Messi lori Arjentina ba Mundial2018. 

 

 

Diego Simeone hatete ona katak nia halo parte hosi grupu ne'ebé nunka iha dúvida ba kualifikasaun hosi selesaun arjentinu nian ba Mundial2018, nune'e mós hosi kualidade Messi nian.

 

"Ha'u haree jogu ho kalma tanba ha'u hatene katak buat hotu sei rezolve ba dalan loos. Messi iha kalan ida ne'ebé maka ema arjentinu tomak husu no hakarak. Ba sira ne'ebé maka la fiar, nia hatudu ona katak nia maka hanesan jogadór di'ak liu iha mundu", hatete hosi treinador Atlético Madrid nian bainhira hakotu konferénsia imprensa ida kona-ba antevizaun hosi dezafiu tuirmai iha kampeonatu españól hodi hasoru Barcelona, klube Lionel Messi nian.

 

"Nia hanesan jogador determinante, bele rezolve jogu ida iha lanse ida, maibé ne'e hanesan buat ne'ebé ha'u hatene ona. Ami konsege manán ona Barcelona iha Liga no ami joga di'ak nafatin hasoru sira. Ami hein katak sira nia ekipa di'ak liu ami nian", nia hatutan.

 

Fonte: SAPO Desporto

Terça-feira, 11.04.17

Ofisial: Edgardo Bauza husik selesaun Arjentina nian

Selesionador admiti ona katak parte rua to'o ona akordu ida. 

 

 

Edgardo Bauza husik ona komando tékniku Arjentina nian. Dirijente ida hosi federasaun fó sai ona iha deklarasaun sira ba jornal arjentinu ida katak to'o ona akordu ho tékniku hodi hakotu funsaun sira iha selesaun súl-amerikanu. Iha deklarasaun badak ba jornal Olé, Claudio Tapia, prezidente hosi Federasaun Arjentina Futebol nian, hatete katak parte rua ne'e hetan ona akordu ida hodi hakotu ligasaun entre parte rua ne'e.

 

Hakotu nune'e parseria ida ne'ebé dura menus duké tinan ida antes to'o nia rohan. Iha nia pasajen liuhosi selesaun Arjentina, Bauza kumpri de'it jogu ualu no hetan de'it vitória tolu.

 

Seidauk iha susesor ida ba ekipa arjentina, maibé iha naran rua ne'ebé maka ko'alia hanesan hipóteze: Diego Simeone ho Jorge Sampaoli. Maibé, tékniku hosi Atlético de Madrid sai hela hanesan favoritu hodi kaer ekipa ‘albi-celeste’.

 

Arjentina iha hela faze kualifikasaun ba Kampeonatu Mundu Rúsia nian iha 2018 iha zona súl-amerikanu nian. Seidauk desidi iha kontinente, tanba Brazil de'it maka hametin ona nia prezensa iha Mundial.

 

@SAPO Desporto

Sábado, 01.04.17

Andújar: "Messi la devia fila ba selesaun arjentina"

Guarda-rede arjentinu refere ona katak avansadu Barcelona nian la devia hetan kolokasaun ba ekipa albiceleste. 

 

 

Kastigadu durante jogu haat, Lionel Messi hetan fali problema sira iha selesaun arjentinu. Mariano Andújar, guarda-rede arjentinu hosi Estudiantes de La Plata, fó sai ona katak astro albiceleste la devia fila hodi reprezenta kór sira selesaun nian.

 

"Messi la devia fila tan [...] Ha'u hanoin katak Leo sei la fila tan, verdadeiramente, maibé nia hakarak tebes selesaun. La devia fila tan. Tansá maka ó fila? Tansá maka sira kritika ó?", Andújar refere iha entrevista ida ba programa Dos Contra Uno, hosi televizaun ida La Plata nian.

 

"Ema ida la valoriza nia, ema hotu hatete katak nia la joga hanesan joga iha Barcelona, katak laiha vontade. Hatete katak la fila tan no to'o loron 09 Jullu tau ona kartaz sira katak nia fila. Ó la hatene katak ó sei lakon", hatutan hosi guardiaun arjentinu.

 

Messi hetan kastigu ba jogu haat, hafoin hatete liafuan sira ne'ebé ladún di'ak ba árbitru auxiliar hosi jogu entre Arjentina ho Xile.

 

Mariano Andújar iha tinan 33 no milita iha Estudiantes de La Plata, iha Arjentina. Époka ne'e partisipa ona iha jogu 12, sofre ona golu hamutuk 13.

 

@SAPO Desporto

Terça-feira, 28.06.16

Maradona: "Messi tenki kontinua iha selesaun"

Diego Maradona husu ba Lionel Messi hodi kontinua iha selesaun arjentina nian. 

 

 

Eis-futebolista internasional arjentinu Diego Maradona husu ona, iha loron-segunda, ba Lionel Messi hodi kontinua joga iha selesaun.

 

"Messi tenki kontinua iha selesaun. Nia tenki kontinua tanba nia tenki to'o iha Rúsia iha kondisaun sira hodi sai kampeaun mundu nian" iha tinan 2018, afirma ona hosi Maradona iha deklarasaun sira ne'ebé haktuir hosi portal jornal arjentinu nian La Nacion.

 

Messi, ho tinan 29, fó sai ona iha loron-domingu, nia adeus ba formasaun ‘albi-celeste’ hafoin lakon final foun ida iha Copa Amérika Centenário hasoru Xile iha penalidade.

 

Jogar koñesidu arjentinu, ne'ebé tinan ne'e eleitu fali nu'udar jogadór di'ak liu iha mundu, konkista Bola Osan-Mean ba dala lima, esplika ona katak hanoin ona iha desizaun ne'e iha balneáriu no to'o ona oras hodi tau pontu ikus iha selesaun.

 

Maradona, ho tinan 55, atribui falta troféu hosi Arjentina iha tinan hirak ikus ne'e ba Asosiasaun Futeból nasaun nian (AFA), hodi akuza katak la apoia Messi no la husik nia asumi kulpa ba lakon iha loron-domingu hodi taka nia defisiénsia sira iha jestaun desportivu.

 

"Tenki apoia tan labarik-mane sira ne'ebé bele ajuda nia lori ekipa ba oin no hamenus sé maka hatete atu sai. Hadook sira ne'ebé la husik nia tanis!", nia afirma ona.

 

"Sira ne'ebé hatete katak tenki sai halo atu ita labele haree katak futeból arjentinu hanesan dezastre ida", eis-futebolista hatete nia krítika ba AFA.

 

AFA hasoru krizi institusional ida iha fulan barak nia laran, nune'e FIFA nomeia ona, iha loron-sesta liubá, komisaun regularizasaun ida ne'ebé sei administra nia atividade loron-loron no organiza eleisaun sira antes loron 30 Juñu 2017.

 

FIFA investiga AFA liuhosi supervizór judisiál na'in tolu hahú hosi fulan-Juñu 2015 tanba deskonfia iregularidade iha jestaun ba fundu públiku sira ne'ebé simu hosi parte Governu nian tanba direitu sira ba transmisaun jogu sira iha televizaun.

 

@SAPO Desporto

Quarta-feira, 30.03.16

Uruguai iha interese hodi halo Mundial 2030 ho Arjentina

Iha konferénsia imprensa, xefe Estadu uruguaiu fó hanoin katak mundiál dahuluk iha istória halo ona iha Uruguai iha tinan 1930, ne'ebé Arjentina maka manán ho 4-2. 

 

 

Prezidente Uruguai nian, Tabaré Vasquez, transmiti ona iha loron-kinta ne'e ba prezidente FIFA nian, Gianni Infantino, dezeju hosi nasaun hodi organiza hamutuk ho Arjentina Mundiál Futebol 2030.

 

Iha okaziaun, prezidente FIFA ne'ebé foin eleitu - ne'ebé halo hela viajen iha nasaun oioin súl-amerikanu nian - indika ona katak organizasaun agora daudaun foka hela ba prosesu atribuisaun ba Mundial 2026 nian.

 

"Iha FIFA, prioridade agora maka ba 2026. Maibé ne'e hanesan pozitivu tanba iha interese hosi parte nasaun rua ne'ebé hakerek ona istória futebol nian", nia hatete.

 

Uruguai ho Arjentina fó sai ona iha inísiu fulan-Janeiru intensaun hodi aprezenta kandidatura hamutuk ida ba organizasaun hosi Kampeonatu Mundu 2030 futebol nian.

 

"Ami desidi katak laiha oportunidade di'ak ida hodi ami kompromete organiza kompetisaun ne'e duké tinan 2030, bainhira hanoin hikas loron ida importante tebes hanesan tinan 100 bainhira hahú Kampeonatu Mundu dahuluk nian. Sede hosi Mundial ne'e tenki halo iha-ne'e", afirma hosi prezidente arjentinu, Maurício Macri, iha deklarasaun ida ne'ebé halo iha Kolónia, iha súl Uruguai nian.

 

Hamutuk ho prezidente Uruguai, Macri asumi mós katak "falta tinan barak" ba Kampeonatu Mundu ne'e no nia esplika katak desizaun ne'e foti agora hodi "buat hotu bele perfeitu no la'o ho di'ak".

 

"Iha pasadu, iha ami nia istória, hodi improviza no tanba ami la preparadu ba situasaun balun, ami liu tiha ona hosi problema balun. Ami hakarak prepara buat hotu ho di'ak no bainhira hahú sedu di'ak liu", refere hosi líder antigu Boca Juniors nian entre tinan 1996 no 2008.

 

@SAPO Desporto

Quinta-feira, 24.03.16

Obama nia família hakarak koñese Lionel Messi

Iha vizita ba Arjentina, Barack Obama halo revelasaun kuriozu ida: nia oan-feto sira hakarak koñese Messi. 

 

EPA@ David Fernandez

 

Prezidente Estadus Unidus Amérika nian, Barack Obama, halo revelasaun kuriozu ida iha nia vizita ba Arjentina hafoin halo tiha vizita istóriku iha Kuba.

 

Iha deklarasaun ba jornal desportivu Olé, prezidente EUA nian hatudu nia koñesimentu desportivu sira no fó sai katak nia oan-feto sira hakarak koñese Lionel Messi hafoin koñese tiha Papa Francisco.

 

"Ha'u nia oan-feto sira koñese tiha ona Papa Francisco. Agora, sira hakarak koñese Lionel Messi maibé ha'u seidauk bele kumpri sira nia hakarak. Sira mós sei laiha oportunidade hodi koñese Palermo, ne'ebé bainhira sira mesak lahó nia aman", Barack Obama hatete.

 

"Ha'u bele konfirma katak (Manu) Ginobili la'ós de'it hanesan ema di'ak ida maibé mós hanesan jogadór ida ne'ebé di'ak liu iha mundu no orgullu ida ba ema arjentinu tomak. Hanesan kampeaun ida", Obama hatutan bainhira ko'alia kona-bá jogadór basket hosi San Antonio Spurs.

 

@SAPO Desporto

Sexta-feira, 08.01.16

Uruguai ho Arjentina hakarak organiza Mundial tinan 2030

Iha tinan 2030 selebra tinan 100 hosi Mundiál Futeból ba dala uluk.

 


Uruguai ho Arjentina sei aprezenta kandidatura hamutuk ida ba organizasaun hosi Kampeonatu Mundu tinan 2030 futeból nian, hodi marka tinan 100 ba Mundiál dahuluk ne'ebé hala'o ona iha Uruguai, fó sai hosi prezidente sira hosi nasaun rua ne'e iha loron-sesta ne'e.

"Ami desidi katak laiha oportunidade di'ak ida hodi ami bele kompromete hodi hala'o kompetisaun duké iha tinan 2030, bainhira marka loron importante ida hanesan tinan 100 dezde Kampeonatu Mundu ba dala uluk. Sede hosi Mundiál ne'e tenki halo iha ne'e", afirma ona hosi prezidente arjentinu, Maurício Macri, iha deklarasaun ida ne'ebé hala'o iha Colónia, iha súl Uruguai nian.

Ho prezidente Uruguai, Tabaré Vasquez, iha nia sorin, Macri asumi ona katak "falta tinan barak" ba Kampeonatu Mundu ne'e no nia esplika ona katak desizaun ne'e foti agora hodi nune'e "buat hotu bele la'o ho di'ak".

"Iha tempu uluk, iha ami nia istória, tanba tenki improviza no la preparadu ba situasaun balun, ami hetan ona problema sira. Ami hakarak prepara buat hotu ho di'ak no bainhira hahú sedu, di'ak liután", refere hosi líder antigu hosi Boca Juniors entre tinan 1996 no 2008.

Uruguai organiza ona, iha tinan 1930, Kampeonatu Mundu dahuluk iha istória, iha kompetisaun ida ne'ebé partisipa de'it ekipa 13 no hotu ho vitória hosi selesaun "seleste" ne'ebé halakon Arjentina iha finál ho 4-2.

@SAPO Desporto

Terça-feira, 10.03.15

Atleta desportu fransés sira entre ema na'in 10 nebe mate iha asidente aéreu iha Arjentina

Grupu ida hosi atleta koñesidu fransés sira nebe partisipa iha programa entretenimentu entre vítima na'in sanulu nebe mate iha asidente aéreu nebe akontese iha loron-segunda ne'e iha Arjentina, haktuir hosi fonte ofisiál sira.


Nadadora olímpiku fransés Camille Muffat sai hanesan vítima nebe mate iha kolizaun entre helikópteru. EPA@ Patrick B. Kraemer 


 

Helikópteru rua xoke malu bainhira semo, iha foho sira iha zona turístiku La Rioja, iha noroeste Arjentina nain, durante filmajen ba "reality show" ida.

 

Velejadora Florence Arthaud, kampeã olímpiku natasaun Camille Muffat no pujilista olímpiku Alexis Vastine hanesan vítima sira nebe mate iha asidente ne'e.

 

"Karik, helikópteru rua ne'e xoke malu bainhira hala'o filmajen. Laiha sobrevivente ida", haktuir hosi porta-vós provinsiál Horacio Alarcon.

 

Haktuir hosi AFP, responsável hanesan afirma mós katak kondisaun klima nian di'ak, nune'e seidauk hatene kauza asidente entre aeronave nebe aluga hosi produsaun programa nian.

 

Fonte hosi polísia informa ona katak pilotu arjentinu na'in rua ho pasajeiru fransés na'in ualu mate - inklui Florence Arthaud, tinan 57, Camille Muffat, tinan 25, ho Alexis Vastine, tinan 28.

 

ho Lusa


pesquisar

 

Outubro 2017

D
S
T
Q
Q
S
S
1
2
3
4
5
6
7
8
9
10
11
12
14
15
16
17
19
20
21
22
23
24
25
26
27
28
29
30
31

posts recentes

últ. comentários

  • Favor hakerek ho formato lolos:Boavista 0 - 1 FC p...
  • Kona ba ita nia selesaun futsal nian nebe dadaun n...
  • Tun ba posizaun 19 = desceu para a decima nona pos...
  • El sonido de una mágica voz.Veo, en la inmensidad ...
  • VIVA! Viva o BENFICA! VIVA! Viva o BENFICA!
  • VIVA! Viva o BENFICA VIVA Viva o BENFICA</b!!!
  • nossa show de bola, parabéns!Very good mens!
  • Manan na'in ba tinan 2013 mak husi ekipa Eni Timor...
  • acho que esta horario incompleto, porque so estava...

arquivos

tags

subscrever feeds

blogs SAPO

Atletismo