Siklista Anche Cabral sei hanesan estreia timoroan iha 'cross country' olímpiku

Siklista Anche Cabral, ho tinan 31, hetan foin lalais ne'e supreza boot rua, bainhira hetan konviti hodi halo estreia Timor-Leste nian iha 'cross country' olímpiku no, iha 24 horas nia laran, nia konsege hetan apoiu finanseiru hodi ba iha Jogu sira Rio2016. 

 

Foto@ SAPO Timor-Leste

Foto@ SAPO Timor-Leste

 

Halo ona apelu ida iha rede sosial sira hodi nune'e atleta simu apoiu finanseiru hodi husik nia serbisu durante fulan ida no, maski nune'e, tulun família - ne'ebé ba nia rendiementu - no mós ba iha Rio de Janeiro.

 

"Ha'u senti suprendidu no haksolok tebes. Ba timoroan sira hanesan ba dala uluk maka ami sei kompete iha modalidade hosi "mountain bike" ne'e. Sei la fásil ba ha'u, ha'u ladún kompetitivu hanesan atleta sira seluk, maibé hanesan onra ida reprezenta ha'u nia nasaun", nia hatete ba ajénsia Lusa.

 

Aleinde Anche Cabral, delegasaun timoroan nian ne'ebé sei ba Rio de Janeiro inklui atleta na'in rua seluk, Augusto Ramos ho Nélias Martins, ne'ebé sira na'in rua sei kompete iha metru 1.500 no hanesan "wild cards".

 

Sistema hosi konviti sira hala'o daudaun hodi promova no fó korajen ba desportu iha modalidade oioin iha nasaun sira ne'ebé asesu ba kompetisaun no rekursu sira ladún permiti ba atleta sira iha asesu ba "palku" internasional sira.

 

Iha kazu Timor-Leste nian partisipasaun sira iha edisaun sira ne'e hetan liuhosi konviti sira, ho delegasaun istóriku - ba dala uluk - kompete iha tinan 2000 iha Jogu Olímpiku sira Sydney nian ne'ebé destaka ona maratonista Águeda Amaral ne'ebé konsege hakotu prova.

 

Agora ne'e, destake ba iha siklizmu ne'ebé Timor-Leste sei estreia, hodi marka esforsu sira ne'ebé nasaun dezenvolve hela hodi promove modalidade ne'e, liuliu hosi Tour de Timor ne'ebé halo tinan-tinan no, iha tinan ne'e, hala'o iha fulan-Setembru.

 

Ba Acnhe Cabral supreza hosi konviti hodi partisipa no resposta hosi sidadaun anónimu sira, nasional no estranjeiru sira, ne'ebé liuhosi plataforma ida angariasaun fundu nian halo nia hetan osan liu 5.000 resin.

 

Apoiu ne'e boot tebes no halo atleta sei konsege buat barak duké ida ne'ebé nia hanoin, tanba besik ona hetan osan sufisiente hodi sosa nia bisikleta ida, hodi husik nune'e uza bisikleta hosi belun no treinador, Nelson Santos nian, ne'ebé treina loron-loron entre kilómetru 30 no 50.

 

Funsionáriu hosi Air Timor, kompañia aérea timoroan nian, iha tinan haat nia laran, Anche Cabral kompete ona iha prova oioin iha Ázia no iha Timor-Leste hodi akumula pontu hamutuk 84.

 

"Ha'u sei halo buat ne'ebé ha'u bele. Ha'u la hatene saida maka sei akontese, prova sira hanesan susar maibé ha'u sei tenta buat ne'ebé ha'u bele", nia garanti ona.

 

Atleta timoroan sei kompete iha Sentru Mountain Bike, perkursu ida ho metru 5.400 ne'ebé tama iha Parte Radical no ne'ebé aproveita topografia hosi rejiaun hodi dezafia partisipante sira, ho kalendáriu ne'ebé sei haree hanesan loron sira kompetisaun nian loron 20 no 21 Agostu.

 

Tuir pájina ofisial hosi Rio2016, edisaun iha tinan ne'e konta ho partisipasaun hosi atleta na'in 80 (mane na'in 50 no feto na'in 30).

 

'Cross-country' halo nia estreia olímpiku iha Atlanta96 no marka prezensa ona iha edisaun sira hosi Jogu sira ne'e no ohin loron hanesan disiplina ida hosi disiplina haat siklizmu nian iha prova.

 

ho Lusa