Quarta-feira, 04.01.17

Golu 20 ne'ebé di'ak liu iha 2016

Mai ita hanoin hikas golu 20 ne'ebé di'ak liu ne'ebé marka iha 2016. 

 

 

2016 hanesan ona tinan ida ne'ebé nakonu ho golu sira ne'ebé furak. Hosi Ozil to'o Jamie Vardy, liuhosi Delle Ali, Shaqiri no Cristiano Ronaldo no Messi. Tinan ne'ebé hotu ona no hamosu obra oioin ne'ebé furak iha golu sira ne'e.

 

Haree iha ne'e golu sira ne'ebé di'ak liu ne'ebé marka iha 2016.

 

@SAPO Desporto

Terça-feira, 03.01.17

Zidane elojia Pepe ho Ronaldo no admiti lakon prémiu ba Fernando Santos

Iha antevizaun ba jogu Tasa Rei nian, iha loron-kuarta, ne'ebé Real Madrid sei hasoru Sevilha, Zidane ko'alia kona-ba Pepe no mós Cristiano Ronaldo. 

 

Foto@DR

 

Treinador Real Madrid nian, fransés Zinedine Zidane, hatutan iha loron-tersa ne'e katak nia hakarak kontinua serbisu ho sentral portugés Pepe, futebolista ne'ebé tuir nia katak bele sai ba klube xinés ida.

 

"Hanesan ami nia jogador, importante. Iha ne'e tinan sanulu ona, halo ona istória iha klube ne'e no ha'u hakarak kontinua nafatin ho ami. Ha'u laiha interese kona-ba saida maka ema ko'alia, maibé kona-ba saida maka nia sei halo hamutuk ho ami, hahú agora to'o final", Zidane refere.

 

Iha antevizaun ba jogu Tasa Rei nian, iha loron-kuarta, ne'ebé Real Madrid sei simu Sevilha, Zidane ko'alia kona-ba Pepe no mós Cristiano Ronaldo, iha loron balun hafoin hatene tiha sé maka sai nu'udar futebolista di'ak liu tinan nian ba FIFA.

 

"Laiha ema ida maka bele iha dúvida ba nia kapasidade sira, hanesan normal iha debate no ida-idak iha opiniaun ida. Saida maka nia halo, nia halo ho di'ak tebes, hanesan úniku. Ha'u sei senti suprendidu bainhira nia la manán prémiu, tanba nia merese buat hotu", hatutan hosi tékniku "merengue sira" nian.

 

Iha konferénsia, treinador fransés ko'alia tópiku oioin, entre sira maka nia kandidatura ba tékniku di'ak liu tinan nian ba FIFA, ne'ebé konkore ho Claudio Ranieri, kampeaun ho Leicester, no Fernando Santos ne'ebé lori Portugal ba títulu europeu inéditu.

 

"Ha'u laiha supreza tanba la sai treinador di'ak liu tinan nian. Hanesan normal ema seluk maka manán, ha'u foin maka hahú. Ha'u tenki serbisu nafatin no hatudu buat barak, maibé ha'u sei to'o iha ne'ebá, maski hanesan normal la manán", nia hatete.

 

Zidane to'o kuaze tinan ida ona iha Real Madrid, hodi troka Rafa Benítez iha kargu ne'ebé ekipa hasai tanba rezultadu sira ne'ebé ladi'ak.

 

Fransés konkista ona iha finak époka ba dala 11 Champions League nian ho Real Madrid, iha final ida ne'ebé halo iha Milaun hasoru Atlético Madrid, ne'ebé "merengue sira" manán iha penalidade sira.

 

"Di'ak liu [tinan nian] maka manán ‘Champions’. Laiha ida ne'ebé aat liu. Ha'u la hanoin ida. Ha'u haree de'it buat sira ho pozitivu", Zidane hakotu.

 

@SAPO Desporto

Barcelona hanoin iha Koeman hodi ba iha Luis Enrique nia fatin

Tékniku holandés ho tinan 53 iha kontratu ho Everton to'o tinan 2019. 

 

 

Barcelona iha ona merkadu hodi buka treinador ida karik Luis Enrique la hela iha Camp Nou. Tékniku hakotu kontratu iha époka ne'e nia rohan no parte rua ne'e mós seidauk hetan akordu kona-ba renovasaun.

 

Tuir ´Sportitalia` responsável sira blaugrana nian hanoin iha Ronaldo Koeman, ne'ebé agora daudaun hanesan Everton nia treinador, karik Luis Enrique la hela. Jose Maria Bartomeu hakarak mantén liña tékniku sira ´Made in Barcelona`, ka ho liafuan sira, aposta iha antigu jogador sira hosi klube ne'e nian, ne'ebé koñese filozofia ekipa nian.

 

Hanoin fali katak Koeman joga ona iha Barcelona durante époka neen. Tékniku holandés ho tinan 53 iha kontratu ho Everton to'o tinan 2019.

 

@SAPO Desporto

Segunda-feira, 02.01.17

AIPS hili Cristiano Ronaldo ho Katinka Hosszu nu'udar desportista europeu sira tinan nian

Asosiasaun Internasional hosi Imprensa Desportivu hili ona futebolista portugés no nadadora húngara.

 

 



Asosiasaun Internasional hosi Imprensa Desportivu (AIPS) hili ona futebolista portugés Cristiano Ronaldo no nadadora húngara Katinka Hosszu nu'udar desportista europeu sira tinan 2016 nian.

Avansadu hosi Real Madrid, ne'ebé manán Champions League, Supertasa Europeiu no Mundial sira Klube nian no Euro2016 ho ekipa portugeza, troka tenista sérviu Novak Djokovic iha istorial prémiu nian.

Katinka Hosszu, ne'ebé manán medalla osan-mean tolu iha Rio2016, manán ona prémiu ne'ebé konkista hosi velosista olandeza Dafne Schippers iha tinan 2015.

Ronaldo ho Hosszu manán eleisaun ne'e ba dala uluk. Portugés halakon tenista britániku Andy Murray no pilotu alemaun Nico Rosberg, no nadadora húngara manán fatin ne'e no hadook kandidatu sira hanesan tenista alemã Angelique Kerber no siklista británika Laura Trott.

@SAPO Desporto

Sexta-feira, 16.12.16

"Ronaldo maka jogadór di'ak liu iha Real Madrid nia istória" - Vicente del Bosque

Portugés manán ona, foin lalais ne'e, nia Ballon d'Or ba dala haat. 

 

 

Vicente del Bosque halo ona parte barak hosi nia kareira nu'udar jogador no treinador Real Madrid nian no, hanesan ema ida ne'ebé hatene klube nia istória, nia konsidera ona Cristiano Ronaldo hanesan jogadór di'ak liu ne'ebé maka joga ona iha Real Madrid.

 

"Hanesan jogadór di'ak liu iha Real Madrid nian istória hosi rejistu sira ne'ebé iha, maibé la valoriza mós jogador sira seluk", nia destaka.

 

Cristiano Ronaldo, tinan 31, hahú hosi tinan 2009/10 joga iha Real Madrid, no iha kontratu ho madrilento sira to'o fulan-Juñu 2021.

 

@SAPO Desporto

Terça-feira, 13.12.16

"Ha'u hatene katak ha'u la halo sala ruma" - Cristiano Ronaldo

Portugés nega katak nia la selu impostu sira iha España. 

 

 

Iha momentu konsagrasaun ba Ballon d'Or hosi revista franseza France Football, Cristiano Ronaldo hasoru ho notísia sira ne'ebé mosu daudaun kona-ba la selu impostu sira.

 

"Loos duni katak ne'e afeta, hanesan bosok bainhira ha'u hatete katak ne'e la afeta. Ha'u la'ós bosok-teen: halo ha'u senti ladi'ak. Prosesu tomak afeta ema hotu ne'ebé besik ha'u. Ha'u tenta halo buat hotu ho di'ak no transparente. Ha'u laiha razaun sira hodi bosok", nia afirma ba France Football.

 

Avansadu hosi Real Madrid nega katak nia la halo buat ruma sala. "Iha ema inosente barak iha kadeia: ha'u senti nune'e. Ha'u senti katak ha'u la halo sala ruma no sira hatete katak ha'u halo buat ne'ebé la loos. Laiha ema ida maka senti haksolok bainhira akontese hanesan ne'e".

 

@SAPO Desporto

Segunda-feira, 12.12.16

Ofisial: Cristiano Ronaldo maka manán Ballon d'Or 2016

Hafoin vitória iha 2008, 2013 ho 2014, "kapitaun" hosi selesaun luzu aumenta prémiu haat no prémiu datolu iha tinan haat nia laran.  

 

 

Hafoin manán iha 2008, 2013 ho 2014, kapitaun" hosi selesaun luzu aumenta prémiu haat no prémiu datolu iha tinan haat nia laran, halakon arjentinu Lionel Messi, ne'ebé hetan ona troféu iha okaziaun lima, no fransés Antoine Griezmann, finalista seluk.

 

Portugés manán ona ho pontu 745, liu Lionel Messi, ne'ebé tama iha fatin daruak ho de'it pontu 316. Griezmann, iha fatin datoluk iha lista, hetan pontu 198.

 

Vitória sira iha Euro2016 futebol nian, ho selesaun luzu, no iha Champions League ho Real Madrid, ho golu hamutuk 51 iha jogu 55 ne'ebé halo iha tinan 2016, konvense ona jornalista sira ne'ebé hili jogadór di'ak liu iha mundu ba revista franseza. Konkista ne'e permiti CR7 izola iha fatin daruak hosi "ranking" prémiu nian.

 

Maski Messi iha liu golu no asisténsia sira, títulu sira halo lakon balansa ba portugés nia fatin, ne'ebé la mosu iha jogu boot sira, liuliu iha final sira, no iha Europeu sai lezionadu sedu tebes.

 

Maski ladún halo buat barak duké nia adversáriu hosi Barcelona, Cristiano Ronaldo sai "liurai-mane" hosi markadór sira edisaun 2015/16 hosi Champions League, ne'ebé iha dékada ida liubá, "determina", tina hafoin tinan, vensedór hosi prémiu ba jogadór di'ak liu tinan nian.

 

Liu duké nia númeru sira, ne'ebé aumenta nafatin no fó ba nia estatutu ida nu'udar markador di'ak liu iha istória Real Madrid nian, Portugal nian no iha Champions League, hanesan títulu sira ne'ebé halo diferensa iha 2016.

 

Portugal ho Real Madrid la sai hanesan evidente, maibé ksolk lori nia ba títulu sira, liuliu dezempate iha penalidade sira, ne'ebé permiti ba ekipa luzu halakon Polónia, iha "kuartu-final" Europeu nian, no ba "merengue sira" halakon viziñu Atletico Madrid iha final ‘Champions’.

 

Iha fatin seluk, Lionel Messi, ne'ebé ho Luis Suárez ho Neymar nia ajuda, lori FC Barcelona hetan títulu españól, ba Tasa Rei no ba Supertasa España nian, lakon fali ho penálti sira hanesan, iha final Kopa Amérika Sentenáriu, lakon hasoru Xile.

 

Vensedór Ballon d'Or 2016 fó sai iha loron-segunda loraik hosi revista ´France Football`, ne'ebé la halo parseria hamutuk ho FIFA ne'ebé antes akontese dezde 2010.

 

Iha fulan-Janeiru, portugés bele simu fali prémiu Jogadór Di'ak Liu iha mundu, liuhosi FIFA.

 

@SAPO Desporto

Dortmund hasoru Benfica iha oitavu-final. FC Porto kontra Juventus

Benfica ho FC Porto hatene ona sira nia adversáriu iha oitavu-final hosi Champions League. 

 

 

Sorteiu hosi Champions League hatudu ona katak Benfica sei hasoru Borussia Dortmund iha oitavu-final no FC Porto sei sukat forsa sira ho Juventus.

 

Sorte ladún barak ba ekipa portugeza sira ne'ebé sei iha misaun ida susar tebes hodi to'o iha kuartu-final Champions nian. Favoritu monu ba kampeaun italianu no klube alemaun, ne'ebé hasoru ona Sporting iha faze grupu sira nian iha Champions League iha temporada ne'e.

 

Atu to'o iha oitavu-final, Benfica sai hanesan klasifikadu daruak iha grupu B, bainhira hetan pontu ualu iha jogu neen.

 

FC porto tama mós hanesan klasifikadu daruak iha grupu B, iha fatin dahuluk maka okupa hosi Leicester.

 

Iha oitavu-final edisaun 16/17 Champions League nian, Benfica ho FC Porto sei joga uluk iha sira nia estádiu, iha loron 14, 15, 21 ka 22 Fevereiru 2017, no jogo daruak sei halo iha estranjeiru iha loron 7,8, 14, ka 15 Marsu.

 

Haree iha ne'e jogu sira hosi oitavu-final Champions League nian:

 

  • Manchester City - Mónako
  • Real Madrid - Nápoles
  • Benfica - Borussia Dortmund
  • Bayern - Arsenal
  • FC Porto - Juventus
  • Leverkusen - Atlético Madrid
  • PSG - Barcelona
  • Sevilha Leicester

 

@ SAPO Desporto

Sexta-feira, 09.12.16

Chapecoense aseita konviti hosi "Barça" no ba torneiu Joan Gamper

Formasaun katalaun konvida ona Chapecoense ba jogu amigável ida iha Troféu Joan Gamper ne'ebé koñesidu. 

 

 

Prezidente ne'ebé hala'o daudaun funsaun iha Chapecoense, Iván Tozzo, konfirma ona iha loron-sesta ne'e ba rádiu katalaun ida katak klube brazileiru futebol nian aseita ona konviti hosi FC Barcelona hodi halo jogu ida hosi prova koñesidu Troféu Joan Gamper, iha 2017.

 

"Hanesan ksolok boot ida mai ami no ami agradese ba FC Barcelona ne'ebé konvida ona ami. Sei hanesan priviléjiu ida no ksolok boot hodi joga iha Europa", Tozzo hatete iha entrevista ba emisora RAC1.

 

Intensaun hosi klube katalaun ne'e maka halo homenajen ba ema na'in 71 ne'ebé mate, iha loron 29 Novembru, bainhira aviaun hosi kompañia aéreu Lamia monu, iha kilómetru 17 hosi aeroportu Medellín, iha Kolómbia, ho ema na'in 77 iha aviaun laran, entre sira maka komitiva hosi Chapecoense, ne'ebé atu halo jogu dahuluk iha final hosi Tasa Súl-Amerikanu iha sidade kolombianu ne'e.

 

Entre vítima sira ne'ebé mate iha asidente, iha jogadór na'in 19 hosi jogadór na'in 22 hosi klube brazileiru ne'e, nune'e mós dirijente sira, ekipa tékniku, konvidadu sira ho jornalista sira, aleinde tripulasaun. Ema na'in neen sobrevive iha asidente, jogadór na'in tolu, tripulante na'in tolu no jornalista na'in ida.

 

Iha loron 05 Dezembru, konfederasaun súl-amerikanu futebol nian (CONMEBOL) deklara ona Chapecoense nu'udar kampeaun hosi Tasa Súl-Amerikanu, hanesan homenajen hafoin asidente.

 

@SAPO Desporto

Quarta-feira, 07.12.16

Rezultadu sira: Ekipa apuradu sira, ekipa sira ne'ebé lakon no sira ne'ebé la promovidu

Hotu ona faze hosi grupu sira Champions League nian. Hatene iha ne'e ekipa sira ne'ebé liu ba oitavu final. 

 

 

Hosi jogu sira loron-kuarta nian, ne'e hanesan rezultadu ikus sira hosi faze grupu sira Champions League nian, nune'e mós bele haree ekipa sira ne'ebé liu, lakon no sira ne'ebé maka ba iha Liga Europa.

 

Benfica ho FC Porto la'o ba oin no Sporting despede hosi kompetisaun europeiu sira nian.

 

Ekipa sira ne'ebé la'o ba oin: Benfica, Nápoles, PSG, Arsenal, Barcelona, Manchester City, Atlético de Madrid, Bayern, Monaco, Leverkusen, Dortmund, Real Madrid, Leicester, FC Porto, Juventus ho Sevilha.

 

Ekipa sira ne'ebé muda ba Liga Europa: Ludogorets, Besiktas, Monchengladbach, Rostov, Tottenham, Legia Varsóvia, Copenhaga, Lyon.

 

Ekipa sira ne'ebé sai hosi kompetisaun europeia sira nian: PSV, Celtic Glasgow, Dinamo de Kiev, Basileia, Dinamo Zagreb, Club Brugge, Sporting, CSKA Moscovo, PSV Eindhoven.

 

@SAPO Desporto

pesquisar

 

Fevereiro 2018

D
S
T
Q
Q
S
S
1
2
3
4
5
6
7
8
9
10
11
12
13
14
15
17
18
19
20
21
22
23
24
25
26
27
28

posts recentes

últ. comentários

  • Favor hakerek ho formato lolos:Boavista 0 - 1 FC p...
  • Kona ba ita nia selesaun futsal nian nebe dadaun n...
  • Tun ba posizaun 19 = desceu para a decima nona pos...
  • El sonido de una mágica voz.Veo, en la inmensidad ...
  • VIVA! Viva o BENFICA! VIVA! Viva o BENFICA!
  • VIVA! Viva o BENFICA VIVA Viva o BENFICA</b!!!
  • nossa show de bola, parabéns!Very good mens!
  • Manan na'in ba tinan 2013 mak husi ekipa Eni Timor...
  • acho que esta horario incompleto, porque so estava...

arquivos

tags

subscrever feeds

blogs SAPO

Atletismo