Quarta-feira, 07.12.16

Rezultadu sira: Ekipa apuradu sira, ekipa sira ne'ebé lakon no sira ne'ebé la promovidu

Hotu ona faze hosi grupu sira Champions League nian. Hatene iha ne'e ekipa sira ne'ebé liu ba oitavu final. 

 

 

Hosi jogu sira loron-kuarta nian, ne'e hanesan rezultadu ikus sira hosi faze grupu sira Champions League nian, nune'e mós bele haree ekipa sira ne'ebé liu, lakon no sira ne'ebé maka ba iha Liga Europa.

 

Benfica ho FC Porto la'o ba oin no Sporting despede hosi kompetisaun europeiu sira nian.

 

Ekipa sira ne'ebé la'o ba oin: Benfica, Nápoles, PSG, Arsenal, Barcelona, Manchester City, Atlético de Madrid, Bayern, Monaco, Leverkusen, Dortmund, Real Madrid, Leicester, FC Porto, Juventus ho Sevilha.

 

Ekipa sira ne'ebé muda ba Liga Europa: Ludogorets, Besiktas, Monchengladbach, Rostov, Tottenham, Legia Varsóvia, Copenhaga, Lyon.

 

Ekipa sira ne'ebé sai hosi kompetisaun europeia sira nian: PSV, Celtic Glasgow, Dinamo de Kiev, Basileia, Dinamo Zagreb, Club Brugge, Sporting, CSKA Moscovo, PSV Eindhoven.

 

@SAPO Desporto

Sérgio Ramos hatete katak 'Football Leaks' hakarak dezestabiliza

Kapitaun Real Madrid nian hatete katak akuzasaun sira hosi evazaun fiskal hosi futebolista "merengue" balun, entre sira maka Cristiano Ronaldo, mosu hodi dezestabiliza ekipa española. 

 

AFP Photo@ Pau Barrena

 

Kapitaun Real Madrid nian, Sérgio Ramos, konsidera iha loron-tersa katak akuzasaun foun sira ba evazaun fiskal ba futebolista "merengue" balun, entre sira maka Cristiano Ronaldo, mosu hodi dezestabiliza ekipa española.

 

"Iha duni bosok no loos, maibé ha'u hanoin katak sira tenta dezestabiliza grupu iha momentu ida ne'ebé di'ak hela", refere hosi Sérgio Ramos, bainhira hatán kona-ba ‘Football Leaks’ iha abordajen ba jogu loron-kuarta ho Borussia Dortmund, ba jornada ikus hosi Champions League.

 

Sérgio Ramos konsidera ona katak akuzasaun sira kona-ba halai hosi fisku hosi jogadór balun hanesan "kestaun sensível tebes", maibé nia refere katak nia fiar iha lei no justisa, departamentu sira ne'ebé "di'ak tebes hodi foti desizaun sira kona-ba matéria ne'e".

 

"Hanesan tema ida ne'ebé susar tebes, maibé ha'u hanoin katak labele afeta jogadór ruma no liuliu dezempeñu ekipa nian", Sérgio Ramos hatete no hatutan katak asuntu sei la afeta rendimentu Real Madrid nian.

 

Iha loron-sesta, membru sira hosi European Investigative Collaborations (EIC), ne'ebé inklui Expresso, Der Spiegel, El Mundo, austríaku Der Falter, belga Le Soir, dinamarkés Politiken, italianu L’Expresso, grupu fransés Mediapart, sérviu Newsweek ho romenu RCIJ The Black Sea, fó sai notísia katak Cristiano Ronaldo, karik, subar euro millaun resin iha impostu liuhosi sosiedade ida iha Illa Virjen sira.

 

Informasaun, ne'ebé envolve mós jogadór sira seluk, entre sira maka Fábio Coentrão, Ricardo Carvalho ka Pepe, nune'e mós internasional alemaun Mesut Ozil, hosi Arsenal, hetan hahú hosi dokumentu sira 1.900 gigabytes ne'ebé refere konsórsiu europeu hetan asesu no kona-ba jornalista sira hamutuk na'in 60 serbisu durante fulan hitu resin nia laran.

 

Tuir dokumentu sira, ne'ebé haktuir hosi OCS hosi plataforma dijital ‘Football leaks’, katak iha jogador koñesidu barak hosi futebol internasional ne'ebé halo esforsu hodi subar sira nia rendimentu ba fisku, hodi fó ezemplu loloos hanesan Ronaldo no Ozil.

 

Deskonfia katak avansadu portugés, tuir El Mundo, uza empreza bosok sira ho sede iha Illa Virjen hodi subar osan sira publisidade nian hamutuk eurp millaun 150 no, tuir Der Spiegel, kolaborador balun ne'ebé koñese di'ak Ronaldo senti preokupadu ho posibilidade hosi detalle sira hosi sosiedade karibeña nian bele to'o iha autoridade sira nia liman laran.

 

Maibé, Gestifute, hosi ajente Jorge Mendes nian, ne'ebé reprezenta interese sira hosi Cristiano Ronaldo ho José Mourinho, hatete ona, iha loron-kinta, iha deklarasaun públiku ida katak sira na'in rua halo tuir sira nia obrigasaun fiskal sira, iha España no mós iha Reinu Unidu.

 

Iha deklarasaun hanesan, ne'ebé haruka ba Ajénsia Lusa, Gestifute hatete katak Cristiano Ronaldo ho José Mourinho nunka envolve iha prosesu judisial ruma ne'ebé iha relasaun ho prátika krimi fiskal no ameasa katak asaun hodi bosok ka akuzasaun ida hanesan ne'e hasoru sira na'in rua sei hato'o ba tribunal.

 

@SAPO Desporto

Terça-feira, 06.12.16

Jornal katalaun garanti Ronaldo hanesan vensedór Ballon d'Or

Mundo Deportivo fó sai katak jogador ho Real Madrid akompãna hela rezultadu hosi votasaun nian. 

 

 

Tuir notísia hosi jornal katalaun Mundo Deportivo, Cristiano Ronaldo maka sai duni vensedór hosi Ballon d'Or 2016, prémiu ne'ebé fó hosi France Football.

 

Diáriu ne'e hakerek katak jogador ho Real Madrid akompaña hela rezultadu hosi votasaun ne'ebé halo hosi France Football, rezultadu ne'ebé sei fó sai ofisial iha loron-segunda, 12 Dezembru.

 

Tuir Mundo Deportivo, sei akontese iha loron-kinta entrevista baibain no sesaun fotográfiku ho vensedór hosi Ballon d'Or, ne'ebé sei entrega ba Ronaldo iha Santiago Bernabéu.

 

@SAPO Desporto

Segunda-feira, 05.12.16

Griezmann hakarak iha Messi nia "jeitu" no CR7 nia "kapasidade serbisu nian"

Jogadór fransés elojia ona rival sira ne'ebé halo parte ba prémiu jogadór di'ak liu iha mundu. 

 

Foto@ Paco Campos / EPA

 

Antoine Griezmann, finalista ida entre finalista na'in tolu ne'ebé konkore ba prémiu jogadór di'ak liu iha mundu ne'ebé fó hosi FIFA, aponta ona kualidade di'ak sira hosi rival na'in rua ne'e.

 

"Hosi Messi, ha'u hakarak iha nia jeitu, fasilidade hodi halo buat sira iha kampu. Remate ida, pase ida...parese ba nia buat hotu hanesan fásil. Hosi Cristiano ha'u hakarak iha kapasidade serbisu nian. Serbisu maka'as loron-loron hodi hadi'a beibeik", hatete hosi jogadór fransés ba kanal RTL.

 

Griezmann hatete mós katak nia simu hanesan normal hipóteze maka'as katak Cristiano Ronaldo konsidera hanesan di'ak liu: "Nia halo ona époka di'ak ida, Manán ona Europeu, Champions...".

 

@SAPO Desporto

Domingo, 04.12.16

Kashima Atlers sai kampeaun japunés no ba Mundial Klube sira nian

Klube nipóniku hamutuk ona ho Atlético Nacional, Real Madrid, Jeonbuk Hyundai Motors, Mamelodi Sundowns, América do México ho Auckland City iha Mundial Klube sira nian. 

 

@AFP Photo

 

Kashima Atlers sai kampeaun japunés futebol nian iha loron-sábadu bainhira halakon Urawa Reds, ho 2-1, hodi garanti vaga iha Mundial Klube sira nian ne'ebé fó ba kampeaun hosi nasaun organizadór eventu nian.

 

Jogu ne'e la hahú fásil ba Kashima Antlers, ne'ebé haree nia avansadu Shinzo Koroki adiata Urawa Reds, iha minutu hitu, maibé Mu Kanazaki empata iha parte dahuluk no aumenta iha penalti, iha minutu antes antes jogu hotu, hodi fó títulu ba nia ekipa, ne'ebé lakon 1-0 iha nia kampu rasik iha jogu dahuluk no agora manán ho 2-1.

 

Jogu ne'ebé garanti títulu ba dala ualu iha Kashima Antlers nia istória hanoin mós ho minutu nonook ida hodi fó homenajen ba vítima sira hosi asidente aviasaun nian ne'ebé halo jogador maioria mate hosi ekipa brazileiru Chapecoense.

 

Klube nipóniku hamutuk ona ho kolombianu Atlético Nacional (kampeaun Tasa Liberador nian), ba españól Real Madrid (Champions League Europa nian), ba ekipa súl-koreanu Jeonbuk Hyundai Motors (Ázia), súl-afrikanu Mamelodi Sundowns (Áfrika), ba América do México (Amérika-Norte) hp neozelandés Auckland City (Oseánia) iha Mundial Klube sira nian ne'ebé sei hala'o iha Japaun entre loron 08 no 18 Dezembru.

 

@SAPO Desporto

Terça-feira, 29.11.16

Final hosi Tasa Súl-Amerikanu Futebol nian suspensu hafoin aviaun ne'ebé lori ekipa brazileiru monu

Konfederasaun Súl-Amerikanu Futebol nian desidi iha loron-tersa ne'e suspende jogu sira ne'ebé sira kaer hafoin aviaun ne'ebé tula ekipa brazileiru Chapecoense, ne'ebé atu joga iha final Tasa Súl-amerikanu, monu iha Kolómbia. 

 

 

Autoridade aas futebol súl-amerikanu nian hatete, liuhosi komunikadu ida, katak "to'o avizu foun" sei suspende atividade tomak no prezidente konfederasaun nian, Alejandro Domínguez, sei ba Medellín, sidade ne'ebé diriji aviaun, hodi akompaña situasaun.

 

Ekipa brazileiru sei halo jogu, iha loron-kuarta, ho kolombianu sira hosi Atlético Nacional iha jogu dahuluk hosi final Tasa Súl-Amerikanu futebol nian.

 

Aviaun lori ema na'in 81 no iha pelumenus ema na'in neen maka moris, haktuir hosi autoridade kolombianu sira.

 

Ajénsia no´tisia EFE verifika ona iha ospitál ida iha fatin La Ceja, ne'ebé lori daudaun ema sira ne'ebé kanek, katak sobrevivente ida maka futebolista brazileiru Alan Ruschel, lateral liman-karuk ho tinan 27.

 

Klube Atlético Nacional lamenta ona asidente liuhosi twitter: "Nacional lamenta tebes no solidariza ho @chapecoensereal".

 

Aviaun monu bainhira halo viajen ba Medellín "iha Cerro El Gordo, iha besik munisípiu La Union, Antiokia", iha zona foho nian, ho tripulante na'in sia no pasajeiru na'in 72 iha aviaun laran, haktuir hosi autoridade sira aviaun sivil Kolómbia nian.

 

Autoridade kolombianu sira hatete katak pelumenus iha sobrevivente na'in neen.

 

Aeroportu Medellín, iha komunikadu, refere ona katak aviaun, ho matríkula Bolívia nian, "deklara ona iha emerjénsia" iha tuku 22:00 (oras lokal) "tanba falla tékniku sira", tuir ne'ebé transmiti hosi tore kontrolu.

 

"Polísia iha ona fatin asidente, ne'ebé bele asede de'it liuhosi terestre", "ladún haree di'ak" tanba kondisaun meteorolójiku sira, hatete hosi nota hanesan.

Aviaun sai hosi aeroportu Viru Viru, hosi Santa Cruz de la Sierra, iha Bolívia, ne'ebé karik halo eskala tékniku ida.

 

@SAPO Desporto

Ema na'in 76 mate iha asidente aviaun ne'ebé lori Chapecoense

Guarda-rede Marcelo Boeck la halo parte entre jogador sira ne'ebé halo viajen ne'e. 

 

Foto@ Luis Eduardo Noriega/EPA

 

Aviaun ida hosi kompañia Lamia ne'ebé lori ema na'in 72 no tripulante na'in sira, inklui ekipa brazileiru Chapecoense monu iha loron-tersa madrugada ne'e besik iha aeroportu internasional Medellín, Kolómbia.

 

Xefe Polísia hosi rejiaun Antiokia, Kolómbia, Jose Acevedo Ossa, konfirma ona ema na'in 76 mate, iha deklarasaun sira ba Rádio Caraco. Elementu polísia ne'e refere mós katak hetan ona ema na'in neen, maibé na'in ida mate bainhira iha dalan ba ospital. Entre sobrevivente sira iha jogadór na'in tolu hosi Chapecoense: Danilo, Jackson Follman ho Alan Ruschel.

 

"Ami serbisu mós hosi hasai mate-isin sira hodi entrega ba sira nia família. Ami konsege hasai ema na'in lima ne'ebé moris hela. Bainhira lorosa'e, ami sei hasai mate-isin sira no hahú prosesu hodi haruka ba sira nia nasaun orijen", nia afirma.

 

Tuir informasaun sira ne'ebé fó hosi aeroportu José Maria Córdova, aviaun lakon kontaktu ho tore kontrolu iha tuku 21h33 (oras lokal) no karik monu iha tuku 22:15 (oras lokal).

 

Chapecoense halo viajen ba Medellín hodi joga hasoru Atlético Nacional, iha jogu dahuluk hosi final Súl-amerikanu nian.

 

Iha rekursu dahuluk, ekipa buka halo viajen diretu ba sidade kolombianu iha aviaun ida ne'ebé sira aluga, maibé la hetan autorizasaun hosi aviasaun brazileiru. Nune'e, formasaun hosi súl Brazil nian tenki semo to'o São Paulo hodi semo ho aviaun Lamia ho destinu ba Medellín.

 

Marcelo Boeck, guarda-rede ne'ebé Sporting empresta ba Chapecoense, la hetan konvokasaun ba enkontru ne'e no nune'e la halo viajen iha aviaun.

 

@SAPO Desporto

Sexta-feira, 25.11.16

Kuwait bele la halo parte iha Tasa Ázia 2019 nian

Selesaun Kuwait bele la halo parte hosi kompetisaun bainhira hetan nafatin suspensaun hosi FIFA. 

 

AFP Photo@ Yasser Al-Zayyat

 

Selesaun Kuwait nian bele la halo parte hosi Tasa Ázia 2019 bainhira iha loron 18 Dezembru sei iha nafatin suspensaun hosi FIFA tanba introdusaun governamental nian iha entidade desportivu nian.

 

Konfederasaun Áziatiku Futebol nian estabelese ona prazu ida semana tolu ba Kuwait hodi rezolve lei ida ne'ebé governu halo ne'ebé afeta independénsia hosi órgaun desportivu sira nian.

 

Kuwait bele sai hosi kompetisaun internasional sira bainhira governu kontinua ho lejislasaun foun ne'ebé FIFA konsidera hanesan intervensaun hosi governu iha entidade desportivu sira nian.

 

Iha Outubru, FIFA ho Komité Olímpiku Internasional (COI) suspende ona Kuwait tanba haree katak autoridade sira hosi nasaun ne'e iha intervensaun iha organizmu desportivu sira, nune'e hanesan suspensaun daruak iha tinan lima ikus ne'e.

 

Tasa Ázia 2019 sei halo iha Emiradu Árabe Unidu.

 

@SAPO Desporto

Quinta-feira, 24.11.16

Timor-Leste tuun fatin lima no Portugal mantén iha pozisaun ualu

Selesaun portugeza futebol nian mantén iha loron-kinta ne'e iha pozisaun ualu iha ‘ranking’ FIFA nian, ne'ebé kontinua lidera hosi Arjentina, maski iha "ameasa" hosi Brazil ne'ebé sa'e ba pozisaun rua. 

 

 

Iha atualizasaun ida ho alterasaun balun entre pozisaun sanulu nian, Alemaña, kampeaun mundu nian, "monu" ba pozisaun tolu, Xile lakon fatin rua hodi tama iha pozisaun haat, ne'ebé iha fulan ida liubá okupa hosi Béljika ne'ebé agora iha pozisaun dalima.

 

Rezultadu hosi "valorizasaun" Xile nian afasta Kolómbia hosi pozisaun dalima ba daneen. Fatin sira seluk entre elite ‘top-10’ okupa nafatin tuir orden ne'e Fransa, Portugal, Uruguai ho España.

 

Suisa hanesan nasaun ho klasifikasaun di'ak liu hosi adversáriu lima Portugal nian iha rupu B hosi kualifikasaun europeiu ba Mundial2018, agora iha "odamatan sira" hosi ‘top-10’, hafoin "haksoit" hosi fatin 14 ba pozisaun 11.

 

Hungria tuun pozisaun haat ba pozisaun 26, Illa Faroé sofre maka'as tanba tuun pozisaun sanulu ba fatin 84, Letónia sa'e ba pozisaun 112 no Andorra hela iha pozisaun 203.

 

Entre nasaun luzófonu sira, Guiné-Bissau sa'e hosi pozisaun 69 ba 68, Cabo Verde tuun hosi pozisaun 71 ba 80, Mosambike sai hosi ‘top-100’, hosi pozisaun 95 ba pozisaun 108, Angola mós tuun pozisaun sanuluk ba postu 144, São Tomé & Prínsipe mantén iha postu 153 no Timor-Leste lakon fatin lima hosi pozisaun 186 tuun ba pozisaun 191.

 

- ‘Ranking’ hosi FIFA, 20 Outubru:

 

1. (1) Arjentina, pontu 1.621.

2. (3) Brazil, pontu 1.410.

3. (2) Alemaña, pontu 1.465.

4. (6) Xile, pontu 1.273.

5. (4) Béljika, pontu 1.382.

6. (5) Kolómbia, pontu 1.361.

7. (7) Fransa, pontu 1.271.

8. (8) Portugal, pontu 1.231.

9. (9) Uruguai, pontu 1.175.

10. (10) España, pontu 1.168.

(...)

68. (69) Guiné-Bissau, pontu 515.

80. (71) Cabo Verde, pontu 508.

108. (95) Mosambike, pontu 359.

111. (110) Gabaun, pontu 323.

144. (134) Angola, pontu 236.

153. (153) São Tomé &Prínsipe, pontu 177.

184. (196) Makau, pontu 82.

191. (186) Timor-Leste, pontu 74.

 

@SAPO Desporto

Quarta-feira, 23.11.16

Ministériu públiku españól husu kadeia tinan rua ba Neymar

Justisa españól husu kadeia ba Neymar no eis-prezidente FC Barcelona nian. 

 

 

Ministériu públiku españól husu ona iha loron-kuarta ne'e kastigu kadeia tinan rua ba futebolista brazileiru no tinan lima ba eis-prezidente FC Barcelona nian Sandro Rosell tanba asaun korupsaun sira no fraude iha kontratasaun jogador nian, ne'ebé halo iha Santos.

 

Aleinde kastigu kadeia nian, ministériu públiku hakarak atu internasional brazileiru hetan kondenasaun hodi selu multa ida ho folin euro millaun 10.

 

Maski arkivu tiha ona, tanba falta prova sira, akuzasaun hasoru prezidente FC Barcelona, Josep Maria Bartomeu, ministériu públiku reklama atu selu multa sira ho folin euro millaun 8,4 no hitu hosi parte klube katalaun nian no hosi Santos.

 

Akuzasaun husu mós kadeia tinan rua ba Neymar nia aman no kadeia tinan ida ba nia inan, tanba korupsaun iha negósiu sira oan-mane nian.

 

Ho baze iha investigasaun sei aprezenta kesar ida hosi fundu investimentu DIS, ne'ebé kaer 40% hosi direitu sira Neymar nian no sei konsidera hanesan vítima iha prosesu transferénsia hosi internasional brazileiru nian hosi Santos ba FC Barcelona.

 

"Barça", kampeaun españól dala rua, fó sai ona transferénsia hosi avansadu brazileiru, halo iha Maiu 2013, ho folin euro millaun 57,1, maibé, hafoin investigasaun ida hosi justisa españól, admiti ona katak operasaun ne'e aas tebes, pelumenus, euro millaun 83,3.

 

@SAPO Desporto

pesquisar

 

Fevereiro 2018

D
S
T
Q
Q
S
S
1
2
3
4
5
6
7
8
9
10
11
12
13
14
15
17
18
19
20
21
22
23
24
25
26
27
28

posts recentes

últ. comentários

  • Favor hakerek ho formato lolos:Boavista 0 - 1 FC p...
  • Kona ba ita nia selesaun futsal nian nebe dadaun n...
  • Tun ba posizaun 19 = desceu para a decima nona pos...
  • El sonido de una mágica voz.Veo, en la inmensidad ...
  • VIVA! Viva o BENFICA! VIVA! Viva o BENFICA!
  • VIVA! Viva o BENFICA VIVA Viva o BENFICA</b!!!
  • nossa show de bola, parabéns!Very good mens!
  • Manan na'in ba tinan 2013 mak husi ekipa Eni Timor...
  • acho que esta horario incompleto, porque so estava...

arquivos

tags

subscrever feeds

blogs SAPO

Atletismo