Timoroan ladún preparadu maibé determinadu liu ba esqui alpino

Timoroan Yohan Goutt Gonçalves asumi ohin katak ladún preparadu ba esqui alpino Mundiál 2015, duke ba Jogu Sochi2014, maibé determinadu liu.

 

 

"Tinan ida ne’e, ha’u nia preparasaun difísil tebes tanba laiha jelu iha Europa, tanba ne’e ha’u nia preparasaun menus, maibé ha’u determinadu liu. Ha’u sei konsege treina iha Turkia no iha Áustria no agora iha Estadus Unidus", hatete ba ajénsia Lusa primeiru reprezentante Timor-Leste nia maka partisipa iha Jogu Olímpiku Invernu.

 

Goutt Gonçalves sai nu’udar 45.º no últimu klasifikadu iha slalom Sochi2014, iha segundu 49,05 hosi vensedór, austríaku Mario Matt, no oras ne’e ambisiona partisipa iha disiplina ne’ebé hanesan no iha slalom jigante iha Mundiál, maka sei realiza hosi 02 no 15 Fevereiru, iha Vail no Beaver Creek, iha Estadus Unidus.

 

"Kualifikasaun ba Mundiál diferente hosi Jogu Olímpiku, sei hala’o kedas iha Estadus Unidus, molok kompetisaun no ha’u sei gadau vaga ida iha slalom no slalom jigante", esplika eskiadór ho tinan 20 ne’e, ne’ebé ambisiona "sei tama  no termina prova ne’e".

 

Yohan Goutt Gonçalves, oan hosi fransés no timoroan, rekoñese estrañeza ho partisipasaun hosi atleta Timor-Leste iha kompetisaun desportu invernu ne’e, liu-liu entre kompetidór sira seluk, realsa domin maka nia simu iha teritóriu, iha ne’ebé hakarak promove programa espesializadu iha esqui.

 

"Dala ikus maka ha’u iha Timor-Leste iha Marsu, wainhira ha’u iha esperiénsia boot hafoin Sochi2014, ho ema rekoñese ha’u no responsávl polítiku sira kongratula. Ha’u hakarak kria, tinan rua molok Jogu Olímpiku Invernu tinan 2018, programa ida ba labarik timoroan sira, ne’ebé maka bele gosta jelu, no ha’u sei ajuda fó treinu sira hodi haree karik sira iha potensiál. Oras ne’e, alinde ha’u, ha’u nia alin mós treinu maka’as atu bele sai eskiadór timoroan", nia hakotu.

 

Auzente hosi Kampeonatu Mundu nian sei iha Portugál, tanba laiha osan hodi asegura prezensa hosi atleta sira maka hanesan Arthur Hanse no Camille Dias, ne’ebé bele kualifika, hafoin halo ida ne’e ba Sochi2014.

 

SAPO TL ho Lusa