Real Madrid manán Villarreal 2-0

Cristiano Ronaldo marka tán fali golu ida ba liga española.

 


Foto: JOSE JORDAN
Cristiano Ronaldo selebra golu iha El Madrigal ho Marcelo no Benzema
Iha loron-sábadu Real Madrid manán Villarreal 2-0 iha jogu ne’ebé konta ba jogu dala neen nian husi kampeonatu españól. Cristiano Ronaldo marka hikas fali diferensa iha markadór, ne’ebé loke ho golu ida husi jogadór kroata Modric iha minutu 32.

Ho interompe husi adeptu Manchester United nian ba Cristiano Ronaldo iha estádiu El Madrigal, Real Madrid loke markadór iha minutu 32 bainhira xuta iha área liur husi Luka Modric. Ho remata husi internasionál kroata halo guarda-rede Asenjo hakfodak no halo1-0 hanesan realidade ida iha jogu oras ida ho balun hafoin Villarreal ameasa ba rede Real Madrid.

Molok intervalu,"merengés sira" aumenta tán vantajen liuhosi Cristiano Ronaldo. Iha minutu 42, fitur portugés nian halo golu daruak ho remata xuta bola dook husi Asenjo hafoin halo jogu furak ida no asisténsia husi Benzema iha parte direita.

Villarreal koko hafoin atu halo reasaun iha jogu segunda parte nian maibé rede baliza Iker Casillas mantén hodi defende no rezultadu iku nafatin ho 2-0. Ho rezultadu ida ne’e, Real Madrid daudaun ne’e provizoria sai pozisaun dahaat nian ho pontu 12.

SAPO TL ho SAPO Desporto

tags: