Ryan Giggs nomeadu ba selesionador Wales nian

Eis-futebolista Ryan Giggs nomeadu iha loron-segunda ne'e nu'udar selesionador Wales nian, asina ona kontratu ba tinan haat, informa hosi federasaun lokal iha konferénsia imprensa. 

 

 

Giggs, ne'ebé halo nia kareira tomak nu'udar futebolista sénior iha Manchester United, hatais kamizola hosi selesaun galeza dala 64.

 

Iha "red devils" maka Giggs hetan nia esperiénsia dahuluk hanesan treinador, bainhira kaer interinamente komando hosi ekipa iha final temporada 2013/14, antes sai hanesan adjuntu hosi holandés Louis van Gaal.

 

"Ha'u senti orgullu tebes tanba fó onra ne'e mai ha'u hodi treina selesaun nasional. Dezafiu sira ne'ebé maka ami sei hetan, ho Liga hosi Nasaun sira no kualifikasaun ba Euro2020, halo ha'u senti entuziasmadu. Ha'u senti ansiozu tebes tanba hahú serbisu ho jogador sira, hodi ami prepara ba enkontru importante sira ne'e iha tinan ne'e nia rohan", nia afirma.

 

Giggs nia jogu dahuluk sei halo iha 22 Marsu, iha China Cup, hasoru nasaun aziátiku iha Nanning.

 

Giggs sei substitui iha komando selesaun nian Chris Coleman, ne'ebé lori Wales ba prezensa istóriku iha meia-final hosi Euro2016 - lakon ho Portugal -, maibé falla iha kualifikasaun ba Mundial2018, antes transfere ba Sunderland.

 

"Ami senti haksolok tebes tanba haree Ryan [Giggs] nomeadu nu'udar selesionador. Ho nia esperiénsia maka'as tanba joga no treina ona klube boot iha mundu, ami senti konfiansa iha futuru di'ak ida ba ami nia selesaun nasional", hatete hosi diretor ezekutivu federasaun nian, Jonathan Ford.

 

Fonte: Lusa