FIFA kastigu Timor-Leste ho lakon hitu iha apuramentu ba Mundial2018 nian

Komité Disiplinar FIFA nian fó kastigu, iha loron-tersa ne'e, ba selesaun futebol Timor-Leste nian ho lakon hitu iha kualifikasaun ba Mundial2018, tanba jogador sira ne'ebé labele eleitu, nune'e mós ho multa ida hamutuk euro rihun 60 resin. 

 

 

Kastigu ne'e aplika ona hosi utilizasaun "hosi total ida jogador na'in sira ne'ebé labele eleitu tanba nia nasionalidade", esplika hosi komité iha komunikadu, ne'ebé hatete katak desizaun ne'e iha relasaun ho kastigu anterior ida hosi AFC, organizmu ne'ebé kaer futebol aziátiku nian.

 

Ekipa timoroan sai ona iha ronda daruak kualifikasaun nian, no hakotu ona grupu iha pozisaun ikus, ho empate rua no lakon neen iha jogu ualu, ho marka golu rua no simu golu hamutuk 36.

 

Entre medida sira ne'ebé foti hosi Komité Disiplinar FIFA nian, Nijéria hetan kastigu ho lakon ida ho 3-0 hasoru Aljéria, bainhira kualifika tiha ona ba Mundial2018 iha Rúsia, iha jogu ne'ebé halo iha loron 10 Novembru 2017.

 

Iha kauza hosi kastigu ne'e maka utilizasaun iregular hosi Abdullahi Shehu, ne'ebé maka hetan suspensaun hela.

 

Kolombianu Edwin Cardona hetan suspensaun ba jogu lima, hafoin halo tiha "asaun diskriminatóriu ba adversáriu ida" iha jogu partikular entre Koreia-Súl ho Kolómbia, iha loron 10 Novembru (ho rezultadu 2-1).

 

ho Lusa