Lisboa eleitu ba Kapital Europeia Desportu 2021

Lisboa eleitu ona ba Kapital Europeia Desportu 2021, fó sai hosi Duarte Cordeiro, visi-prezidente hosi Kámara Munisipal Lisboa nian (CML), ba ajénsia Lusa iha loron-domingu ne'e, ho baze hosi anúnsiu ne'ebé fó sai hosi European Capitals and Cities of Sport Federation (ACES Europe). 

 

 

Bainhira kontakta hosi ajénsia Lusa, Duarte Cordeiro ne'ebé hanesan mós vereador Desportu nian hosi CML, indika ona katak anúnsiu ne'e halo iha jantar ida nia rohan, iha Lisboa, ho komunidade desportivu Lisboa nian no komité ACES Europe, ne'ebé halo ona vizita tékniku ida ba kapital hodi avalia kondisaun sira eventu nian.

 

"La'ós hanesan surpreza ida. Ami hanoin nafatin katak Lisboa sei manán", hatete hosi visi-prezidente CML nian, hodi indika katak kapital portugeza kompete ho Haia, iha Holanda, ne'ebé komité vizita antes.

 

Semana ne'e, komité hosi avaliasaun 'European Capitals and Cities of Sport Federation' vizita ona Lisboa no prezidente hosi organizmu ne'e, Gian Lupattelli, halo ona konferénsia imprensa ida hamutuk ho Duarte Cordeiro no mós ho sekretáriu Estadu ba Juventude ho Desportu, João Paulo Rebelo.

 

Kona-ba eskolla, Duarte Cordeiro konsidera ona hanesan "pontu aas hosi perkursu tomak ne'ebé maka halo hodi aumenta maka'as atividade desportivu". "Hanesan prémiu ida ba Lisboa no mós hanesan responsabilidade ida", nia hatutan.

 

Responsável fó sai iha loron-sesta katak munisípiu Lisboa sei investe euro millaun 26 iha ekipamentu desportivu sira to'o tinan 2021, hodi hanoin ona iha vitória ba kandidatura ne'e.

 

"Ita iha investimentu tomak preparadu to'o tinan 2021, ne'ebé kalkula iha euro millaun 26", nia hatete iha loron-sesta hodi espesifika katak investimentu ne'e destina ba "ekipamentu sira, ba benefisiasaun no rekualifikasaun".

 

Ko'alia kona-ba númeru sira, visi-prezidente hosi autarkia hatete ona iha tempu ne'ebá katak "ema rihun 223 halo regularmente atividade fízika desportivu iha instalasaun sira sidade nian" no Kámara apoia ona klube hamutuk 89 iha tinan 2015, valor ne'ebé aumenta ona ba klube hamutuk 118 iha tinan oinmai.

 

"Entre tinan 2012 no 2017, Kámara Munisipal Lisboa apoia ona klube sira sidade nian ho euro millaun 4,2", nia hatutan.

 

Iha nia opiniaun, Lisboa "hanesan referénsia ida iha nível europeu hodi simu eventu internasional boot sira", tanba sidade simu ona entre tinan 2012 no 2016 "eventu desportivu boot hamutuk 309".

 

Iha tinan sira 2014 no 2015, ne'e reprezenta ona impaktu "diretu ida ho euro millaun 20 no impaktu la'ós diretu ho euro millaun 100", haktuir hosi estudu universitáriu ida ne'ebé maka halo hosi munisípiu, ne'ebé maka visi-prezidente ne'e haktuir.

 

Visi-prezidente no sekretáriu Estadu husik mós liafuan felisitasaun nian ba serbisu ne'ebé dezenvolve hosi vereador Desportu anterior, Jorge Máximo, ne'ebé lidera ona parte barak hosi prosesu kandidatura nian ne'ebé maka hahú iha tinan 2016 nia klaran.

 

ho Lusa