Peru konkista vaga ikus iha faze ikus hosi Mundial2018, bainhira ultrapasa Nova Zelándia

Iha loron-kuarta ne'e Peru konkista ona fatin 32 no vaga ikus iha faze ikus hosi Mundial futebol 2018 nian, ne'ebé sei hala'o iha Rúsia, bainhira manán Nova Zelándia ho 2-0, iha parte daruak hosi ‘play-off’ interkontinental nian. 

 

 

Hafoin 0-0 iha Oseánia, Jefferson Farfán, iha minutu 28, no Christian Ramos, iha minutu 65, marka ona golu sira hosi konjuntu súl-amerikanu nian, ne'ebé partisipa fali iha kampeonatu Mundu nian hafoin tinan 36 hosi prezensa dahaat no ikus ne'ebé akontese iha tinan 1982 liubá.

 

Nune'e, peruanu sira hamutuk ho Brazil, Iraun, Japaun, Méxiku, Béljika, Koreia-Súl, Arábia Saudita, Alemaña, Inglatera, España, Nijéria, Kosta Rika, Polónia, Ejiptu, Sérvia, Islándia, Portugal, Fransa, Uruguai, Arjentina, Kolómbia, Panamá, Senegal, Maroko, Tunízia, Suisa, Kroásia, Suésia, Dinamarka, Austrália ho Rúsia.

 

Mundial2018 hala'o iha Rúsia, hosi loron 14 Juñu to'o 15 Jullu 2018.

 

ho Lusa