Cannavaro substitui Scolari iha komando tékniku hosi Guangzhou Evergrande

Italianu Fabio Cannavaro aprezenta ona, iha loron-kinta, nu'udar treinador hosi Guangzhou Evergrande, kampeaun futebol xinés dala hitu, ba temporada lima oinmai, hodi troka brazileiru Luiz Felipe Scolari. 

 

 

Iha semana liubá, Cannavaro fó sai ona saída hosi Tianjin Quanjian, ne'ebé hakotu liga xineza iha pozisaun datoluk, klube ne'ebé maka hetan substituisaun hosi portugés Paulo Sousa.

 

Italianu, ne'ebé iha tinan 2015 orienta ona Guangzhou Evergrande durante fulan hitu, garanti ona katak senti satisfeitu ho regresu ba ekipa ne'ebé maka domina futebol xinés.

 

"Ha'u hatete nafatin katak loron ida sei fila fali, ha'u senti orgullu tebes no haksolok tanba halo duni. Planu sira ba klube ne'e hanesan estimulante no ne'e halo ha'u iha liután vontade hodi serbisu", afirma hosi antigu futebolista internasional italianu ho tinan 44.

 

Xu Jiayin, proprietáriu hosi klube no mane ida entre ema sira ne'ebé riku liu iha Xina, estabelese ona hanesan objetivu ba tékniku foun hodi iha ekipa ida 100% xineza iha tinan 2020.

 

Tékniku foun hatán ona ba dezafiu hodi afirma: "Ha'u senti konvensidu katak jogador sira Evergrande nian la'ós serve de'it klube maibé mós selesaun nasional nian".

 

Aleinde Tianjin Quanjian ho Guangzhou Evergrande, Fábio Cannavaro, ne'ebé hetan Bola Osan-Mean iha tinan 2006, orienta ona Al Ahli, hosi Emiradu Árabe Unidu, ho Al Nassr, hosi Arábia Saudita.

 

ho Lusa