Ronaldo haruka mensajen ba família hosi labarik-mane ne'ebé mate

Futebolista portugés Cristiano Ronaldo haruka ona mensajen ida solidariedade nian ba família hosi labarik-mane ne'ebé hanesan nia adeptu no ne'ebé mate iha rai-nakdoko Méxiko nian. 

 

 

Ronaldo publika ona iha Twitter nia foto ida kaer kamizola Real Madrid nian ho mensajen "Ba ha'u nia adeptu númeru 1, Santiago".

 

Tuir "media" españól sira, mensajen ne'ebé hakerek iha kamizola hanesan referénsia ida ba Santiago Flores, labarik-mane ida ne'ebé mate iha eskola ida iha Méxiko ne'ebé maka rahun tanba rai-nakdoko ho magnitude ho 7,1 ne'ebé akontese iha loron-tersa liubá.

 

Labarik-mane nia família sira hakerek ba Ronaldo hafoin labarik-mane ne'e mate hodi hatete katak Santiago hanesan nia adeptu ida.

 

Iha nia publikasaun iha Twitter, Ronaldo hakerek ona katak "iha momentu triste ne'e, ha'u haruka abrasu boot ida ba Santiago nia família no ba família tomak ne'ebé lakon membru sira ne'ebé sira hadomi".

 

Atlético Madrid hatete iha loron-sábadu katak sei fó euro rihun 50 hodi tulun ema sira ne'ebé afetadu tanba rai-nakdoko ne'e.

 

ho Lusa