Konfederasaun Aziátika Futebol nian hasai antigu diretór Timor-Leste nian

Iha loron-kinta ne'e, Konfederasaun Aziátiku Futebol nian (AFC) suspende ona, ba moris tomak, antigu diretór tékniku hosi Asosiasaun Futebol Timor-Leste nian Orlando Marques Henriques hosi atividade sira ne'ebé iha ligasaun ho futebol. 

 

 

Desizaun ne'e mosu hafoin hatudu tiha katak Orlando Henriques aseita ona osan hamutuk dolar rihun 15 hodi oferese ba jogador sira hosi ekipa futebol Timor-Leste nian, hodi sira lakon jogu ho Malázia, ne'ebé halo iha loron 20 Maiu, iha Jogu sira Sudeste Aziátiku nian iha tinan 2015, iha Singapura.

 

Orlando Henriques no responsável timoroan seluk, Moisés Natalino de Jesus, deklara ona kulpadu no hetan kondenasaun iha fulan-Novembru 2015 ba kadeia fulan 20 no fulan 24 tanba partisipasaun iha "konspirasaun kriminoza".

 

Maibé antigu diretór tékniku timoroan ne'e hetan libertasaun hosi kadeia iha Singapura.

 

Investigasaun sira halo hosi Corrupt Practices Investigation Bureau (CPIB) ne'ebé kaer timoroan na'in rua ne'e no hosi ko-konspirador sira, indonéziu Nasiruddin ho ema ida hosi Singapura Rajendran R Kurusamy antes jogu, ne'ebé hotu ho 1-0 manán hosi Malázia.

 

Nasiruddin ho Rajendran - konsidera iha tribunal hanesan responsável importante tanba kombina rezultadu sira jogu nian (match-fixing) hosi Singapura - deklara ona kulpadu iha nia julgamentu, no hetan ona kondenasaun ba kadeia, ida-idak, ho fulan 30 no fulan 48.

 

Iha fulan-Janeiru, AFC fó sai ona eskema ida ba falsifikasaun sertidaun moris nian ne'ebé destinadu hodi hatama jogador brazileiru na'in 12 iha selesaun nasional futebol Timor-Leste nian, hodi uza jogador sira iha jogu sira kualifikasaun ba Tasa Ázia 2019 nian, Kampeonatu Mundu 2018 nian no kompetisaun sira seluk.

 

ho Lusa