Ofisial: James Rodriguez iha Bayern Munique

Negósiu ne'e konfirma ona foin lalais ne'e hosi klube bávaru iha rede sosial sira. 

 

 

To'o ona rohan hosi novela ida naruk liu hosi merkadu transferénsia nian. James Rodriguez sei joga iha Bayern Munique iha temporada rua oinmai, tanba empréstimu hosi Real Madrid.

 

Negósiu ne'e konfirma tiha ona foin lalais ne'e hosi klube bávaru iha rede sosial sira. Bayern Munique iha nune'e opsaun hodi sosa jogador ho tinan 25, fiksa iha euro millaun 60.

 

Médiu kolombianu lakon ona fatin iha plantel Real Madrid no iha tinan rua ikus ne'e ladún joga. James iha ona pedidu oioin, entre sira maka iha Manchester United, Arsenal, Juventus. Ikusmai hili kampeaun alemaun ne'ebé nia sei joga iha temporada rua oinmai, ho empréstimu.

 

Iha Bayern Munique, James sei hasoru Carlo Ancelotti, tékniku ne'ebé orienta nia iha Real Madrid. Iha períudu ne'e maka "El Bandido" hetan nia momentu ne'ebé di'ak tebes iha klube merengue, ho komando hosi treinador italianu nian.

 

James Rodriguez nia saída hosi Real Madrid hein tiha ona. Médiu sira Marcos Llorente ho Dani Ceballos ne'ebé to'o iha Real Madrid, kalkula antes ona katak kolombianu sei sai hosi Bernabéu.

 

Iha Bayern Munique, James sei simu euro millaun neen ba temporada ida.

 

James Rodriguez hahú koñesidu iha Engivado hosi Kolómbia, hafoin ne'e sai ba Banfield, iha tinan júnior. Hafoin époka rua, transfere ba FC Porto ho 7,35. Iha Dragaun sai koñesidu durante époka tolu to'o Mónako sosa ho euro millaun 45. Iha Fransa nia hatudu nafatin nia jogu hanesan organizador jogu nian no goleador hodi nune'e konvense Real Madrid hodi fó euro millaun 75 ba nia pase iha époka 2014/2015, hafoin joga ho di'ak tebes iha Mundial2014.

 

@SAPO Desporto