Prezidente Barcelona: "Messi selu hanesan ida ne'ebé di'ak liu iha mundu"

Josep Maria Bartolomeu felisita tebes arjentinu. 

 

 

Prezidente FC Barcelona nian, Josep Maria Bartolomeu, hatete ona katak futebolista Lionel Messi "selu hanesan jogador ne'ebé di'ak liu iha mundu", liutiha loron rua hafoin fó sai anúnsiu kona-ba renovasaun kontratu ho avansadu internasional arjentinu nian.

 

"Hanesan jogador di'ak liu iha mundu no selu hanesan ida ne'ebé di'ak liu iha mundu no hosi istória futebol nian. Hanesan jogador hosi desportu koletivu sira ne'ebé hetan osan di'ak liu tanba laiha ema ida maka fó liu ba nia klube hanesan Leo Messi", Bartolomeu hatete iha entrevista ba diáriu Mundo Deportivo.

 

FC Barcelona fó sai iha loron-kuarta ne'e katak hetan ona akordu ho Messi hodi aumenta kontratu ba tinan tolu oinmai, to'o loron 30 Juñu 2021, sei ofisializa iha semana hirak tuirmai, bainhira jogador fila hosi períudu férias nian.

 

Avansadu arjentinu, tinan 30, sai ona jogador di'ak liu iha mundu ho rekord ida dala lima (2009, 2010, 2011, 2012 ho 2015), nia kontratu atu hotu ho katalaun sira iha final époka 2017/2018.

 

Barça la halo referénsia ba folin sira ne'ebé envolvidu, maski diáriu desportivu Marca avansa ho kláuzula ida resizaun nian ho folin euro millaun 300, no mós la temi kona-ba ezisténsia hosi períudu ida hosi tinan adisional ida opsaun nian, fó sai hosi komunikasaun sosial española.

 

Messi to'o ona ho tinan 13 iha sentru formasaun FC Barcelona, sai nu'udar referénsia boot iha klube katalaun, marka ona golu hamutuk 507, iha jogu hamutuk 583, manán ona troféu oioin entre sira maka Champions League haat no kampeonatu España nian dala ualu.

 

@SAPO Desporto