Cristiano Ronaldo, jogador ida ne'ebé la hatene para halo rekord

Cristiano Ronaldo hakotu nia temporada boot iha Real Madrid, maibé konkista sira bele akontese nafatin durante tinan 2017 nia laran. 




Ronaldo hakotu, iha loron-sábadu liubá, nu'udar markador di'ak liu iha Champions League ba époka dalima konsekutivu, ho golu rua iha triunfu Real Madrid nian hasoru Juventus, ne'ebé halo merengue sira hetan Tasa ba dala 12.

 

CR7 soma ona golu hamutuk 12 durante edisaun Champions League ne'ebé agora hotu no halakon ona Lionel Messi, tanba golu rua ne'ebé nia hatama iha final iha Cardiff. Hanoin fali katak, iha faze grupu sira nian, portugés marka de'it golu rua.

 

Internasional portugés tama ona iha grupu limitadu ida hosi jogador sira ne'ebé halo golu rua iha final ida hosi prova milionáriu, hamutuk ona ho Daniele Massaro (AC Milan, 1994), Karl-Heinz Riedle (Borussia Dortmund, 1997), Hernán Crespo (Milan, 2005), Filippo Inzaghi (Milan, 2007) ho Diego Milito (Inter, 2010).

 

Kapitaun hosi selesaun portugeza sai mós nu'udar jogador datoluk, hafoin Andrés Iniesta ho Clarence Seedorf, iha istória UEFA Champions League nian ne'ebé manán final haat.

 

Ho tinan 32, Cristiano Ronaldo hakotu époka iha Real Madrid manán kampeonatu españól, Champions League. Konkista rua ne'e impulsionadu hafoin manán tiha, ba dala uluk, kampeonatu europeu ida ho selesaun portugeza no ne'ebé nia triunfu bele aumenta iha Rúsia iha Tasa Konfederasaun sira, ne'ebé hahú iha loron 17 fulan ne'e.

 

Nune'e, Cristiano Ronaldo konkista ona nia Champions League dahaat, ida dahuluk iha 2007/08 bainhira hamutuk ho Manchester United no hafoin ne'e tolu ho kamizola Real Madrid nian (2013/14, 2015/16 ho 2016/17).

 

Avansadu hosi Real Madrid sai mós jogador dahuluk ne'ebé marka iha final tolu hosi Champions League, halakon Sergio Ramos (defeza úniku ne'ebé marka iha final rua), Raúl González, Samuel Eto'o ho Lionel Messi.


Cristiano Ronaldo hakotu nia temporada boot iha Real Madrid, maibé konkista sira bele akontese nafatin durante tinan 2017 nia laran. Agora daudaun, haree fila fali golu 12 hosi jogador portugés iha edisaun 2016/17 hosi Champions League.

 

 

@SAPO Desporto