Final Liga Europa nian sei halo iha semana hanesan ho Champions

Desizaun ne'e foti iha loron-tersa iha reuniaun hosi Komité Ezekutivu UEFA nian iha Helsínquia, ne'ebé desidi ona katak final hosi Liga Europa entre 2018-2021 sei halo iha loron 29 fulan-Maiu. 

 

 

Final hosi Liga Europa "iha siklu tomak 2018-2021" sei halo iha semana hanesan ho Champions League no "hafoin hotu temporada sira iha nível internu", fó sai hosi UEFA iha loron-tersa.

 

Desizaun ne'e foti iha reuniaun hosi Komité Ezekutivu UEFA nian, halo iha Helsínquia, ne'ebé halo antes hosi Kongresu Ordináriu ba dala 41 hosi organizasaun, ne'ebé desidi ona katak final hosi Liga Europa iha 2018 sei halo iha loron 29 fulan-Maiu.

 

"Desizaun ne'e foti ona hodi nune'e final UEFA Europa League sei halo - hanesan ho final UEFA Champions League nian - hafoin hakotu temporada sira iha nível internu", bele le iha komunikadu.

 

Iha reuniaun desidi mós katak, hahú 2022, Europeu futsal nian sei halo "tinan haat dala ida, ho prezensa hosi selesaun finalista hamutuk 16", la'ós hanesan agora ne'ebé halo tinan rua dala ida, ho selesaun 12.

 

"Mudansa ne'e sei oferese estrutura kompetitivu di'ak ida (ho faze kualifikasaun aumenta ba temporada rua) no sei evita problema ne'ebé akontese daudaun, tinan haat dala ida, iha faze final prova nian ne'ebé akontese iha tempu hanesan ho faze final hosi Kampeonatu Mundu Futsal FIFA nian", justifika hosi organizasaun.

 

Komité Ezekutivu UEFA nian desidi mós realizasaun, tinan rua dala ida, hosi Kampeonatu Europa Futsal feto nian, UEFA Women's Futsal EURO.

Edisaun dahuluk hosi prova sei halo iha 2019 no sei konta ho selesaun finalista haat, tanba númeru sei limitadu hosi selesaun nasional europeu futsal feto nian ne'ebé agora daudaun ezisti.

 

Sei halo mós hahú tinan 2019 no mós tinan rua dala ida kampeonatu europeu futsal sub-19 ho prezensa hosi selesaun finalista ualu.

 

Iha Helsínquia desidi mós katak, hahú ona hosi temporada 2017/18, Tasa UEFA futsal – ne'ebé sei hanaran ´UEFA Futsal Champions League - sei aumenta ba reprezentante adisional ida hosi federasaun tolu ne'ebé iha liu pozisaun di'ak iha "ranking" hosi koefisiente sira hosi ekipa nasional sira modalidade nian.

 

Komité Ezekutivu UEFA nian konfirma mós loron sira hosi faze ikus Kampeonatu Europa Sub-21 nian hosi UEFA 2019 nian, halo iha Itália, entre loron 16 no 30 Juñu 2019.

 

Reuniaun foun hosi Komité Ezekutivu UEFA nian sei halo iha loron 01 fulan-Juñu 2017, iha Cardiff.

 

@SAPO Desporto