Barcelona lansa akademia iha Xina

Fatin ne'e sei hetan alunu xinés hamutuk rihun resin. 

 

 

Klube españól Barcelona lansa ona iha loron-sesta ne'e iha Xina akademia futebol ida ba alunu hamutuk rihun resin, iha tempu ne'ebé nasaun ho populasaun barak liu iha mundu kaer ambisaun hodi sai hanesan poténsia ida iha modalidade ne'e.

 

Jogador koñesidu antigu hosi Barcelona Ronaldinho Gaúcho no prezidente klube nian, Josep Maria Bartomeu, vizita ona akademia foun, lokaliza iha illa tropikal Hainan, extremu súl nasaun nian.

 

"Ba ha'u, temperatura, ambiente, ema sira no liuliu rai hosi illa ne'e sei hanesan buat úniku ba dezenvolvimentu futebol nian iha Xina", afirma ona hosi líder klube españól nian.

 

Akademia hahú halo funsionamentu iha tinan ne'e nia rohan no iha kampu futebol hitu. Fatin sei serve mós ba selesaun nasional Xina nian no ba klube prinsipal sira seluk hosi nasaun ne'e hodi halo treinu.

 

Xina, ne'ebé tama iha fatin 86 hosi "ranking" FIFA nian, hakarak harii akademia futebol hamutuk 50.000, to'o tinan 2025, hanesan planu ambisiozu ida hosi Pekin, ne'ebé hakarak tau nasaun iha nível hanesan ho selesaun di'ak sira iha mundu.

 

"Barcelona FC serbisu di'ak tebes ho joven sira, ho profisional sira iha nível aas, ne'ebé mai iha ne'e", afirma hosi internasional brazileiru Ronaldinho. "Ha'u fiar katak sei ajuda maka'as no atu futebol iha Xina sei aprende maka'as", nia hatutan.

 

Akademia iha Xina sei hanesan boot liu entre akademia 20 ne'ebé Barcelona harii iha mundu tomak. Sei hanesan akademia úniku ne'ebé jere diretu hosi funsionáriu sira klube nian.

 

Maibé, fatin ne'e sei hanesan ki'ik liu duké akademia hosi kampeaun xinés nian Guangzhou Evergrande, konsidera hanesan boot liu iha mundu, ne'ebé loke ho parseria hamutuk ho Real Madrid no iha alunu na'in 2.000 resin.

 

Iha 2014, antigu kapitaun hosi selesaun portugeza Luís Figo lansa ona akademia ida hosi modalidade ne'e iha Xina, ne'ebé to'o hala'o iha sidade hamutuk 16 iha Xina, maibé ohin loron iha de'it 10, hafoin investidor prinsipal sai tiha hosi projetu.

 

Iha 2015, prezidente Sporting nian, Bruno de Carvalho, fó sai iha Pekin katak sei harii akademia hamutuk 20 iha Xina, to'o tinan 2018.

 

Benfica iha ona akademia ida futebol nian iha Hangzhou, kapital prósperu ida hosi provínsia Zhejiang, iha kosta leste Xina nian.

 

Treinador no profisional sira hosi futebol portugés hamutuk atus resin serbisu ona iha nasaun ne'e, fahe hosi akademia sira no klube sira. Koñesidu liu maka André Villas-Boas, antigu tékniku hosi FC Porto, ne'ebé orienta Shanghai SIPG, hanesan kandidatu ida hodi manán superliga xineza.

 

@SAPO Desporto