Paris Saint-Germain manán Barcelona iha Parque dos Príncipes

Dí Maria halo ezibisaun ida luzu tebes iha ninia loron aniversáriu ho aponta golu rua hasoru 'catalães'.


Foto: LIONEL BONAVENTURE / AFP

 

Paris Saint-Germain manán iha tersa-feira ne’e hasoru Barcelona ho 4-0, iha jogu ne’ebé konta ba parte dahuluk oitavu finál Liga Campeões nian, no garante forma ne’e ho vantajen ida konfortável iha deslokasaun ba Camp Nou ba enkontru ba parte daruak nian.

 

Simu Barcelona, formasaun parisiense laintimida ho estatu 'catalães'nian iha Europa no tenta dezde hahú tuir sira nia ritmu iha Parque dos Príncipes. Iha minutu18, Di María hetan oportunidade halo markasaun livre diretu ida ba baliza Barcelona, ho remate ida perfeitu tebes halo 1-0 ho klasse aas.

 

Barcelona ho André Gomes no Iniesta iha klaran tenta halo reajen ba desvantajen ne’e, maibé dezatensaun ida ladun abituál hosi Lionel Messi permite ba Paris Saint-Germain rekupera bola iha zona proibida no hanaruk tan vantajen hosi intermédiu Draxler iha minutu 40.

 

Iha tempu daruak pratikamente hahú ho golu antologia ida hosi Angél Di María iha minutu 55. Internasionál arjentinu ne’e konsege arranja fatin tama iha área Barcelona ho simulasaun liuhosi remate ida ho ángulo haluan tan markadór ba 3-0.

 

Lakon ho 3-0, Luis Enrique hasai André Gomes hosi jogu no hatama Rafinha. Paris Saint-Germain kontrola jogu, no iha minutu 71 Cavani fixa rezultadu finál ba 4-0.

 

Ho rezultadu ne’e, Barcelona iha tarefa ida komplikadu tebes ba jogu tuir mai iha Campo Nou. Ba Paris Saint-Germain konfirma ona momentu di’ak iha Liga Campeões no garante vitória istórika ida iha prova ne’e.

 

SAPO TL ho SAPO Desportu