FIFA aumenta kastigu ne'ebé fó ba responsável hosi federasaun timoroan

FIFA explika katak desizaun ne'e bandu Amândio de Araújo Sarmento hodi labele partisipa durante tinan tolu "iha atividade balun ne'ebé relasionadu ho futebol". 

 

 

FIFA fó sai ona katak aumenta ona ba nível mundial kastigu ida ne'ebé fó hosi Komisaun Disiplinar hosi Konfederasaun Aziátiku Futebol nian (CAF) ba sekretáriu-jeral hosi Federasaun Futebol Timor-Leste nian, ne'ebé duun uza dokumentu falsu hodi regulariza jogador brazileiru sira.

 

Desizaun hosi FIFA, ne'ebé fó sai iha pájina iha internet hosi organizasaun nian, explika katak desizaun ne'e bandu Amândio de Araújo Sarmento hodi labele partisipa durante tinan tolu "iha atividade balun ne'ebé relasionadu ho futebol" iha nível mundial.

 

"CAF halo investigasaun hamutuk ho FIFA kona-ba kolokasaun hosi jogador sira ne'ebé la elejível hosi Timor-Leste. Hafoin simu arkivu hosi CAF, FIFA agora iha hela prosesu hodi hakotu nia investigasaun rasik", explika hosi FIFA.

 

Iha loron 20 Janeiru Konfederasaun Aziátiku Futebol (CAF) nian suspende ona Timor-Leste hosi edisaun tinan 2023 ba Tasa Aziátiku hafoin komprova katak federasaun timoroan uza ona jogador brazileiru na'in 12 ho dokumentu nasionalidade sira ne'ebé falsu.

 

CAF explika ona iha tempu ne'ebá katak desizaun ne'e foti hafoin investigasaun ida, hahú iha fulan-Juñu tinan liubá, kona-ba uzu jogador brazileiru sira durante períudu hosi kualifikasaun ba Tasa Aziátiku edisaun tinan 2019.

 

Aleinde bandu Timor-Leste hodi labele partisipa iha kualifikasaun ba edisaun tinan 2023 hosi troféu, federasaun timoroan tenki seu multa ida ho folin dolar rihun 20.

 

Sekretáriu-jeral hosi federasaun Timor-Leste nian, Amândio de Araújo Sarmento, hetan kastigu hodi labele tuir atividade sira relasionadu ho futebol durante tinan tolu no kondena selu multa ho folin dolar rihun sira. Responsável seluk, Gelásio Da Silva Carvalho, hetan multa dolar rihun tolu tanba tenta interfere ho investigasaun.

 

Ajénsia Lusa fó sai ona iha fulan-Dezembru katak investigasaun ida hosi CAF hatudu ona katak jogador brazileiru sira rejista ona iha selesaun ho sertidaun sira moris nian ka sertidaun batizmu falsu ne'ebé hatudu katak sira nia aman ka inan ka aman-inan sira moris iha Timor-Leste.

 

"Verifika ona katak elementu sira ne'e hanesan falsu", refere hosi komunikadu ida hosi CAF ne'ebé explika katak "investigasaun la permiti ona konkluzaun balun kona-ba validade hosi sidadania Timor-Leste nian ne'ebé maka futebolista sira ne'e hetan" maski "ne'e hanesan kestaun ida ba autoridade sira Timor-Leste nian".

 

Jogador brazileiru sira na'in sia ne'e partisipa ona iha jogu hamutuk 29 ho juridisaun hosi CAF, liuliu iha kualifikasaun ba Tasa Aziátiku tinan 2019 (ne'ebé Timor-Leste lakon) no iha jogu hitu ho juridisaun hosi FIFA, liuliu hosi kualifikasaun ba Mundial 2018 nian (ne'ebé Timor-Leste lakon mós).

 

Investigasaun hosi CAF ne'e tau hamutuk ho investigasaun ida seluk kona-ba kazu hanesan ne'ebé hahú iha 2015 hosi FIFA no seidauk hatene nia rezultadu sira, ne'ebé asuntu ne'e sai mós hanesan inkéritu ida hosi ezekutivu timoroan.

 

Lahó liga nasional iha tinan barak nia laran, Timor-Leste sa'e, entre tinan 2011 no 2015, iha 'ranking' FIFAnian hosi pozisaun 205 ba 170, no agora daudaun iha pozisaun 191, pozisaun ida ne'ebé bele afetadu hosi desizaun disiplinar sira.

 

@SAPO Desporto