Imprensa española avansa katak Real Madrid admiti husik La Liga

Relasaun sira entre Liga Española ho klube ladún di'ak hafoin adiamentu hosi enkontru ho Celta de Vigo.


 

 

Real Madrid ladún satisfeitu ho jerénsia hosi Liga Española no hanoin hela desizaun hodi husik kampeonatu. Tuir jornal español AS, adiamentu hosi jogu "merengue sira" ho Celta de Vigo hamosu daudaun situasaun ladi'ak entre responsável sira klube nian ho dirijente sira Liga nian. Hasoru senáriu ne'e, diáriu realsa katak "blanko sira" ameasa duni husik liga hodi kria Super Liga Europeia ida.

 

Ideia hosi liga ida ne'ebé kompostu hosi klube prinsipal sira hosi europa iha sistema kampeonatu ida la'ós hanesan novidade no konta ho apoiu hosi emblema boot balun futebol europeu nian. Iha lista dahuluk iha Bayern Munique ho Juventus.

 

Enkontru entre Real Madrid ho Celta de Vigo adia tiha ona tanba tempu ne'ebé ladi'ak no, iha kalendáriu okupadu hosi "blanko sira nian", seidauk iha loron definitivu. Ho atrazu ne'e, Ronaldo ho Pepe nia ekipa iha jogu atrazu rua ba Barcelona ne'ebé iha pozisaun daruak ho menus pontu ida. Jogu seluk ne'ebé tenki halo maka Real Madrid ho Valénsia.

 

@SAPO Desporto