Usain Bolt admiti katak sei bele sai "imortal"

Velosista bele halo istória karik manán medalla osan-mean iha metru 200 no iha metru 4x100 ba Jamaika. 

 

Foto: Bernd Thissen / EPA

 

Jamaikanu Usain Bolt, ne'ebé iha loron-segunda ne'e sai hanesan trikampeaun olímpiku dahuluk iha istória iha metru 100, iha Rio2016, admiti katak bele sai "imortal".

 

"Ema ida hatete katak ha'u bele sai imortal. Ho tan medalla rua no ha'u bele asina iha kraik: Imortal", hatete hosi Bolt ne'ebé ho tinan 29 buka mos "tri" iha metru 200 no iha 4x100 metru ba Jamaika.

 

Kampeaun iha Pekin2008 no Londres2012, Bolt halai iha final ho segundu 9,81, bainhira norte-amerikanu Justin Gatlin ho 9,89 hetan medalla osan-mutin, hafoin sai hanesan datoluk iha tinan haat liubá. Medalla bronze hetan hosi kanadianu Andre de Grasse ho 9,91.

 

"Hanesan brillante. Ha'u la'ós lalais liu (hanesan rekord mundial 9,58) maibé ha'u senti haksolok tanba manán. Ha'u hatete ba imi katak ha'u sei bele", nia hatutan.

 

Kampeaun iha Atenas2004, Justin Gatlin, ne'ebé hakarak sai nu'udar kampeaun olímpiku iha metru 100 ne'ebé katuas liu, senti satisfeitu ho buat ne'ebé nia hetan.

 

"Ami serbisu loron 365 tinan ida nia laran hodi bele to'o iha ne'e iha segundu sia nia laran. Ho tinan 34, halai hasoru joven sira ne'e no nune'e tama iha pozisaun dahuluk sira hanesan sensasaun di'ak ida. Medalla ne'e hanesan ba ha'u nia oan-mane. Karik nia hadeer hela hodi haree, ha'u hadomi ó, ha'u nia oan-mane", nia hatete.

 

Gatlin, ne'ebé suspensu dala rua tanba kestaun doping nian, bainhira tama iha pista ba final ema hakfuik hasoru nia.

 

@SAPO Desporto