Polísia sira halo greve iha kapital brazileiru tanba Jogu Olímpiku sira

Brazília funsiona hanesan subsede hosi Jogu Olímpiku sira Rio de Janeiro nian. 

 

Foto: Diego Azubel/EPA

 

Polísia sivil sira hosi Distritu Federal aprova ona, iha loron-kuarta ne'e, iha asembleia, paralizasaun jeral ida durante oras 48 nia laran entre loron-kinta no loron-sesta, períudu ne'ebé inklui jogu sira futebol nian iha Brazília iha ámbitu hosi Jogu Olímpiku sira Rio2016.

 

Estádiu Mané Garrincha, iha Brazília, sidade ne'ebé funsiona hanesan subsede hosi Jogu Olímpiku sira Rio de Janeiro nian, simu jogu futeból maskulinu rua loron-kinta loraik, iha estreia ba modalidade nian iha kompetisaun, liuliu jogu entre Irake ho Dinamarka no, ikus maka, jogu entre Brazil ho Áfrika-Súl.

 

Aleinde greve, grupu - ne'ebé hatudu daudaun iha semana hirak ikus ne'e -, aprova ona entrega hosi kargu sira xefia nain no desidi ona halo manifestasaun ida iha loron-kinta iha estádiu Mané Garrincha, durante jogu Brazil nian, haktuir hosi jornal Correio Braziliense.

 

Grupu defende ekipasaun hodi hadi'a saláriu kategoria nian ho reajuste hosi Polísia Federal.

 

Iha karta ne'ebé fó sai iha fulan-Jullu nia rohan, governadór Rodrigo Rollemberg komenta ona katak nia konsidera ekiparasaun salarial justu, maibé nia aviza ona katak negosiasaun salarial "tenki hanoin ba situasaun krizi maka'as" ne'ebé maka Brazil hasoru.

 

Portal G1 hakerek katak funsionamentu hosi eskuadra ida iha estádiu laran, ho arkibankada, bele hetan mós suspensu.

 

Maibé, iha deklarasaun sira ba jornalista sira iha semana liubá, sekretáriu Seguransa Públiku nian hosi Distritu Federal, Márcia de Alencar, la hatudu preokupasaun ho seguransa, afirma katak plantaun sira ba Jogu sira "sei reforsa no garanti maski iha sirkunstánsia sira hosi adezaun ba greve".

 

"Operasaun [iha Jogu Olímpiku sira] halo liuliu iha polisiamentu iha estrada no iha operasaun sira salvamentu nian, halo hosi Polísia Militar no hosi bombeiru sira", nia refere.

 

Jogu Olímpiku sira akontese iha tempu ne'ebé Brazil hasoru resesaun ekonómiku naruk ida no aumentu hosi ema dezempregu sira.

 

Jogu sira hamosu mós preokupasaun maka'as ho seguransa, la'ós de'it tanba istorial hosi kriminalidade violentu iha nasaun, maibé mós tanba fenómenu foun hosi terorizmu "jihadista" ne'ebé akontese iha mundu.

 

@SAPO Desporto