Papa Francisco dezeja "prestasaun di'ak" ida ba atleta sira hotu

Sumu Pontífise fó hanoin katak mundu afetadu hela ho moras "krueldade" nian. 

 

 

Papa Francisco, iha loron-kuarta ne'e, fó korajen ba partisipante sira hosi Jogu Olímpiku sira Rio2016 nian hodi iha "prestasaun di'ak" ida, reforsa solidariedade iha mundu ida ne'ebé iha hela "moras krueldade" nian.

 

Atuál xefe Estadu Vatikanu nian husik ona mensajen ida esperansa nian ba ema hotu, ne'ebé nia defende katak "espíritu hosi Jogu Olímpiku sira bele inspira partisipante sira no espetadór sira hotu, hodi iha prestasaun di'ak ida".

 

Nune'e, papa hein atu ema hotu iha deseju ne'e, la'ós hodi hetan de'it medalla ida, maibé, liuliu, buat ne'ebé di'ak liu: "realizasaun hosi sivilizasaun ida ne'ebé iha solidariedade", iha mundu ida ne'ebé iha hela "moras krueldade" nian.

 

Pontífise insisti ona katak "mundu hamrook ba solidariedade, toleránsia no rekonsiliasaun". "Ita hotu hanesan membru hosi família humanu, la haree ba diferensa kultura, kór kulit nian ka relijiaun".

 

"Ba ema brazileiru sira, ne'ebé, ho nia ksolok no hospitalidade, organiza Festa Desportu nian, ha'u husu atu ne'e hanesan oportunidade hodi halakon momentu susar sira no hodi harii nasaun ida justu liu, seguru liu, aposta ba futuru ida nakonu ho esperansa no ksolok", papa hatutan.

 

Xefe Estadu Vatikanu nian "pinta" tiha ona kuadru triste ida mundu nian, evoka, iha semana liubá, iha nia vizita nonook ba kampu antigu nazi Auschwitz-Birkenau, ne'ebé ema millaun 1,1 resin, entre sira ema judeu millaun ida, ema oho durante Funu Mundial Daruak.

 

"Ho nonook, ha'u reza ona ba vítima sira hotu hosi violénsia ho funu nian. (...) Haree ba krueldade ne'e, iha kampu konsentrasaun ne'e, ha'u hanoin kedas iha krueldade sira ohin loron nian la'ós de'it iha fatin ne'e, maibé iha mundu tomak", hakotu hosi susesór papa Bento XVI nian.

 

@SAPO Desporto