Brazil aumenta seguransa iha aeroportu sira

Nasaun anfitriaun hakarak simu lista hosi pasajeiru sira ne'ebé uza aviaun iha oras 72 antes. 

 

 Foto: Lukas Coch /EPA

 

Polísia Federal (PF) Brazil nian hakarak simu ho oras 72 antes, durante mós Jogu Olímpiku sira, lista hosi pasajeiru sira ne'ebé mai hosi estranjeiru ba nasaun ne'e, hatete hosi fonte polísia ida iha loron-segunda ne'e.

 

Durante inaugurasaun hosi sentru internasional ba koperasaun polisial, ne'ebé sei funsiona durante Jogu Olímpiku sira no Paralímpiku sira, xefe Interpol nian iha Brazil no delegadu hosi Polísia Federal, Valdecyr Urquiza Júnior, ne'ebé haktuir hosi jornal Folha de São Paulo, hatete katak prosedimentu tenki hahú hala'o "durante jogu sira".

 

Pasajeiru sira nia naran sei peskiza ho lista internasional ida hosi suspeitu terorizmu nian hamutuk 3.000 no rihun 44 seluk hosi krimi sira seluk.

 

Ajente seguransa estranjeiru sira sei partisipa iha sistema, verifika naran sira kompatriota nian diretu iha lista sira informasaun nian hosi sira nia nasaun orijen.

 

Iha inaugurasaun ba Sentru Koperasaun Polisial Internasional (CCPI), iha Brazília, ministru Justisa, Alexandre de Moraes, no diretor-jeral hosi Polísia Federal, Leandro Daiello, destaka ona katak sistema koperasaun internasional ba Jogu sira hanesan boot liu iha istória nasaun nian no iha Interpol (Organizasaun Internasional hosi Polísia Kriminal).

 

Leandro Daiello refere ona katak sistema ida hanesan uza tiha ona ba Kampeonatu Mundu Futeból nian iha 2014, iha Rio de Janeiro, bainhira "seguransa rekoñesidu hanesan pontu ida importante liu" iha kompetisaun.

 

Tuir xefe Interpol nian iha Brazil, Polísia Federal uza mós sistema ida rekoñesimentu oin nian no imajen sira rekolla iha pontu oioin sirkulasaun nian, hanesan aeroportu sira ka arena desportivu sira.

 

Ministru Justisa hatutan ona katak aumenta mós sistema foun ida rekolla nian no verifikasaun ba impresaun dijital sira hosi pasajeiru sira hotu ne'ebé to'o iha Brazil.

 

"Ami halo ona lisaun hosi uma. Buat hotu modernu liu, buat hotu ne'ebé iha integrasaun ho nasaun sira seluk, informasaun no intelijénsia, Brazil iha. Entaun, ami prepara ba eventualidade ruma", hatutan hosi governante.

 

CCPI ida seluk sei inaugura iha loron-tersa iha Rio de Janeiro.

 

Jogu Olímpiku no Paralímpiku sira sei hala'o entre loron-sesta ne'e to'o loron 18 Setembru.

 

@SAPO Desporto