Portugál tama ba finál iha futeból no garante 30ª medalla

Portugál tama ba finál ohin hosi torneiu futeból iha Jogu sira CPLP nian ne’ebé hala’o iha Kabuverde, iha ne’ebé nia sei joga ho Angola, no garante ona 30.ª medalla no buka 22.ª osa-mean.

Portugál tama ba finál hafoin iha sábadu kalan manán Brazil ho 1-0, iha jogu meia-final ne’ebé joga iha Estádio Marcelo Leitão, iha sidade Espargos, iha Sal.

 

Adversáriu iha finál mak Angola, ne’ebé manán kabuverde ho 3-0, iha jogu meia-final ida seluk ne’ebé mós joga iha sábadu.

 

Finál hosi torneiu futeból monu iha domingu, ne’e mak sei sai hanesan rohan hosi atividade molok serimónia enserramentu Jogu sira Komunidade Nasaun Lia-portugés (CPLP) nian.

 

Portugál garante ona nia medalla hamutuk 30 no buka osan-mean ba dala 22, no garante katak sei manán iha Jogu sira.

Portugál konkista mós medalla osan-mutin hitu no bronze ida.

 

Iha deklarasaun ba ajénsia Lusa, xefe misaun Portugál nian, Filipa Godinho, halo balansu "pozitivu tebes" hosi partisipasaun portugeza iha jogu sira CPLP nian, no destaka vitórias no medalla barak, maibé liu-liu konvivénsia no fahe esperiénsia hosi parte joven atleta sira.

 

Filipa Godinho hein katak eventu multidesportivu ne’e termina ho di’ak ba Portugál, ho konkista medalla osan-mean iha futeból, maibé salienta katak importante liu mak atleta sira bele diverte no goza momentu ne’e.

 

Jogu sira CPLP nian, ne’ebé hala’o semana ida, halibur iha illa kabuverdiana Sal joven atleta besik 500 hosi Kabuverde, Angola, Brazil, Portugál, Mosambike, Saun Tomé no Prínsipe ho Timor-Leste, ne’ebé kompete iha modalidade futeból, atletizmu, andeból, taekwondo, basketeból, natasaun ho voleiból de praia.

 

Giné-Bisau ho Giné Ekuatoriál deziste atu partisipa iha kompetisaun sira, ne’ebé destina ba atleta sira ho seksu rua ne’e hosi sub-16, esetu natasaun ho atletizmu paralímpiku iha ne’ebé bele partisipa atleta sira hosi sub-20.

 

SAPO TL ho Lusa