PM mosambikanu husu medalla ba delegasaun nasaun iha Jogu sira CPLP nian

Primeiru-ministru mosambikanu, Carlos Agostinho do Rosário, enkoraja ohin delegasaun nasaun nian ba 10.ª edisaun Jogu Desportivu sira CPLP nian hodi lori medalla no dignifika nasaun durante kompetisaun, no husu ba atleta sira atu hatudu disiplina.

"Buat ne’ebé ha’u husu ba imi mak lori medalla mai, signifika Prezidente Repúblika [Filipe Nyusi] ezije atu siri lori medalla", afirma Agostinho do Rosário, ne’ebé ko’alia iha serimónia despedida delegasaun mosambikana nian ba Jogu sira, ne’ebé sei hala’o hosi 12 to’o 24 fulan ne’e iha sidade Sal, iha Kabuverde.

 

Kada ema ida hosi atleta 68  ne’ebé sei reprezenta Mosambike, resalva Agostinho do Rosário, sei sai embaixadór mosambikanu millaun 25 nian, papél ne’ebé presiza responsabilidade boot ba membru delegasaun sira.

 

"Tenke disiplina iha kampu laran ka liur, imi-nia selesaun hodi partisipa iha jogu sira hatudu katak imi ne’e di’ak tebes entre sira ne’ebé di’ak", nia deklara.

 

Mosambikanu sira, bainhira atu sai hosi uma, sei hakilar no basa liman atu prestasaun delegasaun nasaun nian iha 10.ª edisaun Jogu Desportivu sira CPLP nian bele sai satisfatória, hatutan Agostinho do Rosário.

 

Delegasaun mosambikana ba kompetisaun kompostu hosi atleta sira, ho idade entre tinan 14 no 16, iha futeból, andeból, atletizmu, basketeból, taekwondo no vólei de praia.

 

SAPO TL ho Lusa

 

tags: ,