Euro2016: Timoroan sira halo festa antes no enxe estrada sira iha Díli ho bandeira portugés nian

Joven atus resin ho karreta no motor hahú hosi loraik ne'e iha Díli hatudu apoiu ba selesaun Portugal nian, oras antes akontese jogu hasoru Wales iha meia-final Euro2016 futeból nian. 

 

Foto fó hosi Heineken Timor-Leste ba SAPO Timor-Leste

 

Bandeira portugés sira nian, ne'ebé antes haree de'it iha fatin balun ka iha karreta ka iha timoroan balun nia liman, aumenta maka'as iha loron-kuarta loraik ne'e, iha oras lokal.

 

Besik tuku 19:00 (oras lokal no tuku 11:00 iha Lisboa), kalan ona iha Díli no oras sia antes hahú jogu iha Lyon, Fransa, bele rona hakilar hosi karavana sira motor no karreta sira ne'ebé hahú apita, liuliu bainhira liu hosi fatin sira ne'ebé iha ligasaun ho Portugal ka fatin sira ne'ebé iha ema portugés sira.

 

Sira liu hosi embaixada Portugal, rezidénsia hosi embaixador, delegasaun Lusa nian no fatin sira hanesan Hotel Timor no apita maka's iha fatin sira ne'e, iha festa ida ne'ebé hanoin hikas selebrasaun sira ne'ebé marka vitória Portugal nian hasoru Polónia iha semana liubá, iha kuartu-final.

 

Iha loron-kuarta ne'e, Governu fó ona toleránsia pontu no iha loron-kinta hanesan feriadu tanba selebra Ramadaun nia rohan no halo parte hosi kalendáriu feriadu sira nian iha Timor-Leste, nune'e karik sei iha festa ida ne'ebé boot duké festa baibain bainhira Portugal manán.

 

Enkontru ne'e transmiti hahú hosi tuku 04:00 no iha fatin oioin maka komunidade portugés sei halibur hamutuk, liuliu iha Hotel Timor no iha Doce Tentação, kafé foun ida ne'ebé instala iha sede Sport Díli e Benfica.

 

ho Lusa