Tour de Timor 2016 sei hala’o iha setembru ho etapa lima, no maratona Dili sei realiza iha fulan outubru

Edisaun Tour de Timor ba tinan 2016, sei konta ho etapa lima ba iha bisikleta haleu foho ne’ebé sei hala’o durante loron lima, hosi 13 to’o 17-setembru, tuir informasaun hosi Sekretaria Estadu Juventude no Desportu (SEJD) ohin.


                                                                                                 Foto: SAPO TL


Iha komunikadu, SEJD fó sai mos katak Díli Maratona Internacional sei hala’o iha 08-outubru ho nivel kompetisaun tolu: maratona ho  kilómetru 42, meia maratona  21 no 'fun-run' ho kilómetru hitu.

 

Siklista sira ne’ebé sei partisipa iha Tour de Timor  sei la’o liu hosi fatin furak ne’ebé ezisti iha teritóriu Timór, hanesan iha etapa dahuluk liga hosi Díli-Manatuto, parte leste kapitál, hakat bá Remexio (Aileu) no Lacló, ho distánsia kilómetru 82,5.

 

Sei kontinua ba parte leste, tanba iha etapa daruak ho kilómetru 92,5, liga Manatuto bá Quelicai (Baucau) no etapa datolu liga hosi fatin refere bá to’o Iliomar (Lautem) parte sudeste, no sei liu hosi Uatulari ho Uatucarbau (Viqueque) ho distánsia totál 83,5 km.

 

Etapa dahaat hosi Iliomar bá Com (104 km) no etapa dalima nian entre Lospalos to’o Baucau, ho distánsia totál kilómetru 87.

 

Tuir Leovigildo da Costa Hornai, sekretáriu Estadu Juventude no Desportu, eventu rua ne’e maka sai nu’udar importánsia espesiál ba Timor-Leste, tanba ajuda promove "espírito dame no fó sai potensiál hosi desportu nomós turismu" iha rai-laran.

 

Fundadór hosi eventu rua ne’e, José Ramos-Horta, eis-Prezidente Repúblika, maka sai patrosinadór ba lansamentu hosi edisaun tinan ne’e nian, no haktuir katak Timor-Leste, kada tinan sei kontinua hala’o nafatin eventu rua ne’e.

 

SAPO TL ho Lusa