Indonézia hetan akordu hodi hapara suspensaun hosi FIFA

Governu ho Federasaun Futebol Indonézia nian hetan ona akordu ida. 

 

 

Ministru Desportu hosi Indonézia, Imam Nahrawi, fó sai iha loron-kuarta ne'e katak Governu hetan ona akordu ho federasaun futebol (PSSI, iha sigla ho lian indonéziu) hodi rezolve problema ne'ebé hamosu suspensaun ne'ebé maka FIFA fó.

 

Iha fulan-Maiu 2015, FIFA suspende ona futebol indonéziu hosi kompetisaun internasional tomak tanba intromisaun hosi Governu iha PSSI, konflitu ida ne'ebé bele hapara ona.

 

"Iha kalan ikus ne'e, hafoin asina tiha dokumentu ida ne'ebé hapara kastigu sira, ha'u haruka ona karta ida ba FIFA hodi nune'e organizmu ne'e hetan koñesimentu ba akordu ne'e", fó sai hosi Imam Nahrawi.

 

Akordu ne'e mos antes hahú Kongressu hosi FIFA, ne'ebé hahú iha loron-kinta, iha Sidade Méxiko, ne'ebé karik bele halakon suspensaun ba futebol indonéziu.

 

Iha fulan-Abril, autoridade indonéziu sira hasoru malu tiha ho prezidente foun FIFA nian, Gianni Infantino, no agora hetan ona akordu ho federasaun, ne'ebé kompromete ona aplika reforma sira ne'ebé Governu husu.

 

Entre motivu prinsipal sira hosi problema entre Governu ho federasaun iha saláriu sira ne'ebé simu tarde no falta planu asisténsia médiku sira ba jogadór sira, falla sira ne'ebé halo autoridade governamental sira tenki halo intervensaun.

 

"Governu fiar katak PSSI sei kordena ho autoridade sira, klube sira no FIFA kona-bá implementasaun hosi reforma total ida iha futebol indonéziu", hatutan hosi ministru.

 

Iha loron-tersa, Imam Nahrawi fó sai ona katak hala'o hela diálogu hodi tenta kontrata portugés José Mourinho hodi treina selesaun futeból hosi nasaun aziátiku ne'e.

 

Imam Nahrawi fó sai katak nia ko'alia ona ho Prezidente Indonézia nian, Joko Widodo, no líder hosi komité olímpiku nasaun nian, Erick Thohir, maski nia admiti katak "la'ós hanesan asuntu fásil ida".

 

@SAPO Desporto