Azarenka ho Kuznetsova kualifika ba final hosi torneiu ténis Miami nian

Bielorusa Victoria Azarenka, iha pozisaun daualuk hosi "ranking" mundial no rusa Svetlana Kuznetsova, iha pozisaun 19 hosi "ranking", kualifika ona iha loron-kinta ba final hosi torneiu Miami nian iha Estadus Unidus. 

 

 

Iha meia-final, Azarenka, ne'ebé iha semana rua liubá sai kampeaun hosi torneiu Indian Wells, iha mós Estadus Unidus, kualifika ona ba final ida tan, hafoin halakon tenista alemaun Angelique Kerber ne'ebé iha pozisaun datoluk iha "ranking" iha mundu.

 

Iha jogu daualuk iha kampu, jogadora bielorusa, ne'ebé buka hetan títulu datoluk iha Miami, hafoin manán iha tinan 2009 no 2011, halakon, ba dala hitu, Kerber, ne'ebé tinan ne'e manán Open Austrália, ho 6-2 no 7-5.

 

Iha final Miami, Azarenka sei hasoru malu ho veterana Kuznetsova ne'ebé hanesan kampeaun iha edisaun Miami tinan 2006.

 

Iha meia final, Kuznetsova, ho tinan 30, halakon suisa Timea Bacsinszky, iha pozisaun 20 iha "ranking", ho set rua 7-5 no 6-3, mantén nune'e vitória datoluk bainhira hasoru malu ho tenista helvétiku ne'e.

 

Iha final, Azarenka no Kuznetsova sei dezempata rejistu hosi konfrontu diretu sira, ne'ebé momentu ne'e sira na'in rua, ida-idak, iha vitória haat.

 

Hanesan ba dala tolu maka finalista na'in rua tinan 2016 nian hasoru malu iha Miami, iha dahuluk ho final ho vitória ba sira ida-idak.

 

Ba dala ikus bainhira sira na'in rua hasoru malu iha sirkuitu, iha kuartu final Open Austrália 2013, Azarenka manán, no manán konfrontu tolu ikus hasoru Kuznetsova.

 

Jogadora na'in rua sai ona mós hanesan visi-kampeaun hosi Estoril Open antigu, ne'ebé nia versaun foun "halakon" torneiu ba feto sira. Azarenka to'o iha final iha tinan 2007 bainhira Kuznetsova sai nu'udar finalista iha 2014.

 

@SAPO Desporto