Liverpool empata iha Old Trafford no hakat ba 'kuartu'finál

Philippe Coutinho marka golu  empate nian molok intervalu.


Foto: EPA/Peter Powell 

 

Liverpool tama ba kuartu-de-finál Liga Europa nian hafoin empata iha kinta-feira ne’e iha Old Trafford hasoru Manchester United ho 1-1.

 

'Reds' sira ba iha Manchester hodi  kumpre  jogu ba segunda mão 'oitavu' finál nian ho vantajen 2-0 ne’ebé hetan iha jogu primeira mão iha Anfield Road, no konsege tama ba 'kuartu' finál kompetisaun ne’e ho empate ne’ebé hetan iha primeiru tempu.

 

Iha Old Trafford, ekipa Louis van Gaal marka uluk golu iha minutu 32 liuhosi markasaun penalidade ho susesu hosi Martial. Manchester United konsege reduz desvantajen iha eliminatória ne’e, no hela deit golu ida atu halo empate.

 

Maibé, molok   intervalu ekipa Jurgen Klopp halo empate hosi intermédiu Philippe Coutinho no  koloka fila fali vantajen ba nia ekipa iha eliminatóriu ne’e.

 

Louis van Gaal hatama tan Antonio Valencia iha segunda parte, Darmian no Schweinsteiger, maibé jogu nafatin  empata ho 1-1. Ho rezultadu ne’e, Manchester United tenki sai hosi Liga Europa, enkuantu Liverpool hakat ba kuartu finál kompetisaun ne’e hosi  nia 'rivál' inglés.

 

SAPO TL  ho SAPO Desportu