Djokovic mana'an Masters ténis nian no halo istória

Iha pozisaun númeru ida iha mundu presiza de'it oras ida no minutu 20 hodi halakon Federer, númeru datolu iha hierarkia, ho parsiál 6-3 no 6-4.

 

Novak Djokovic. Foto: Lusa


Sérviu Novak Djokovic iha loron-segunda ne'e sai hanesan tenista dahuluk ne'ebé maka mana'an Masters, ne'ebé akontese iha Londres, dala haat tuirmalu, no iha ne'e nia halakon iha finál suisu Roger Federer ho "set" rua.

Iha pozisaun númeru ida iha mundu presiza de'it oras ida no minutu 20 hodi halakon Federer, númeru datolu iha hierarkia, ho parsiál 6-3 no 6-4, nune'e nia hetan Masters dalima iha nia kareira, hafoin duplu falta ida hosi helvétiku.

Aleinde hosi "prize money" ho euro millaun rua resin, Djokovic sai hanesan jogadór dahuluk iha istória ne'ebé maka mana'an torneiu iha final temporada nian dala haat konsekutivu. Sérviu foti troféu ne'e ba dala uluk iha 2008.

Tenista ho tinan 28 despede hosi tinan 2015 ho títulu 11 iha "bolsu", inklui "Grand Slam" tolu, falla de'it iha Roland Garros, ne'ebé nia lakon iha finál hasoru suisu Stanislas Wawrinka.

Maski lakon, Federer kontinua nafatin nu'udar rekordista hosi títulu sira Master nian (2003, 2004, 2006, 2007, 2010 ho 2011) no hein katak hakotu tinan ne'e iha pozisaun daruak hosi "ranking" ATP nian.

@SAPO Desporto