Ducati konfirma ona Jorge Lorenzo ba 2017 no 2018

Ho kontratasaun ida ne’e, Ducati hein katak bele luta fila fali ba  títulu mundiál ne’ebé lahetan  dezde 2007, momentu ida ne’ebé manán hosi australianu Casey Stoner.


Foto: DR

 

Kampeaun  mundiál MotoGP, españól Jorge Lorenzo, sei  troka Yamaha ba iha Ducati, ne’ebé maka sei hahú kompete iha 2017 no 2018, anunsia kompañia italiana ne’e iha ohin.

 

“Ducati anunsia katak  hetan ona akordu ho Jorge Lorenzo ne’ebé maka  pilotu españól ne’e sei reprezenta marka ne’e iha Kampeonatu Mundiál MotoGP  nian iha 2017 no 2018,  Ducati Desmosedici GP  hosi Ducati Team”, haktuir marka ne’e.

 

Aléinde títulu ne’ebé nia hetan, maiorkinu ne’e moos sai kampeaun mundiál iha 2010 no 2012, nafatin ho  Yamaha, ne’ebé maka nia hahú  iha MotoGP  tinan 2008, manán ona  korrida 41 no sa’e  pódiu dala  99, iha  prova 141.

 

Iha époka ida ne’e, hafoin prova dalatolu, Lorenzo okupa iha segunda pozisaun kampeonatu nian, ho hetan vitória dala ida, no iha  semana oin mai sei kompete iha uma rasik, España nian  iha sirkuitu Jerez de la Frontera.

 

Ho kontratasaun ida ne’e, Ducati hein katak bele luta fila fali ba  títulu mundiál ne’ebé lahetan  dezde 2007, momentu ida ne’ebé manán hosi australianu Casey Stoner.

 

Iha  époka ne’e Ducati moos iha Andrea Dovizioso no  Andrea Iannone ne’ebé to’o ogora sa’e ona  pódiu dala rua iha  prova dala tolu nian: ekipa seidauk hili ida hosi sira atu kompensa entrada  españól ne’e.

 

Yamaha konfirma ona katak sei kontinua nafatin hoValentino Rossi, kampeaun Mundiál MotoGP badala hitu no ne’ebé foin lalais ne’e  renova ninia kontratu ho marka japoneza to’o 2018, agora falta deit atu hatudu  sé maka sai nia  parseiru hahú 2017.

 

Aléinde iha títulu mundiál iha MotoGP ba dalatolu, Jorge Lorenzo sai tiha ona  Kampeaun 250 cc iha  2006 no 2007.

 

SAPO TL ho SAPO Desportu