Ronaldo marka golu, maibé Real Madrid lakon iha Turim

Juventus halakon Real Madrid 2-1 iha jogu primeira mão hosi meias-finais Liga Kampeaun.

 

 

Foto: OLIVIER MORIN / AFP
Cristiano Ronaldo durante jogu ho Juventus.

 

Ohin dadeersan Juventus halakon Real Madrid 2-1 no konkista vantajan uitoan iha meias-finais hosi Liga Kampeaun. Morata no Tévez marka ba "Juve", Cristiano Ronaldo marka golu ida ne’ebé mantén "merengues" hodi hakat ba Berlim.

 

Resintu "Vecchia Signora" ne’ebé enxe hodi simu kampeaun sira hosi Europa no jogadór sira hosi ekipa rua ne’e koresponde ho kalan kmanek hosi futeból, maibé ho erro imperdoável hosi defeza Real Madrid. Emosaun sira ne’ebé forte hahú kedas iha jogu hahú, ho "traisaun" ki’ik-oan ida hosi antigu jogadór "blanco".

Iha minutu sia de’it hafoin jogu hala’o, Tévez hetan fatin ida no remata ba baliza Casillas, aproveita tanba Marcelo loke dalan. Guarda-redes Real Madrid sei desvia tiha bola, maibé Álvaro Morata mosu ba Pepe nia oin hodi enkosta uluk golu hosi jogu. Joven avansadu españól, ho idade 22, festeja hafoin "halo golu" ba ninia ekipa uluk ninian.

Iha desvantajen ba iha eliminatória, Real Madrid sa’e ba liña no koko atu halo bola ba bebeik ba  dupla atake, komposta hosi Ronaldo no Bale (Benzema la joga tanba aleza). Iha minutu 27, portugés ne’e rasik maka empata no fó volta ba eliminatória. Serbisu di’ak ida hosi James Rodríguez iha parte direita halo kruzamentu ida hodi CR7 kabesa, bola tama liuba rede laran Buffon nian. Iha golu 77 hosi portugés iha Liga Kampeaun, ho Messi maka sai relegadu ba segundu lugar hosi mellor markadór iha kompetisaun.

Iha primeiru tempu, Real Madrid tuir lolos bele hetan vantajen - James kabesa bola ida kona iha ai-latan baliza Buffon nian – maibé to’o intervalu empata bola idaida. "Merengues" lori vantajen tanjensiál iha eliminatória, maibé buat hotu muda iha minutu 56: Carlos Tévez ho diresaun ba baliza Casillas no konsege "aranka" hetan penalidade, ne’ebé falta hosi Carvajal. Arjentinu hatudu ninia esperteza hodi hein kontatu hosi laterál. Iha konversaun, Tévez rasik maka suta maka’as ba baliza Casillas no halo 2-1 ba Juventus.

Formasaun italiana sei iha okaziaun osa-mean rua hodi halo golu datoluk, iha okaziaun rua ne’e hosi  Llorente: iha minutu 87', españól finta Casillas maibé la marka no bola lakon. Iha minutu "deskontu", Llorente rasik maka falla maka’as iha área boot, kabesa ba defeza Casillas.

Juventus iha vantajen ba iha Berlim, maibé golu ne’ebé marka iha Turim halo Real Madrid iha pozisaun di’ak hodi konsege halo reviravolta iha jogu segunda mão, iha Santiago Bernabéu.

 

SAPO TL ho SAPO Desporto

tags: