Balotelli maka sai erói iha Anfield

Avansadu italianu marka golu vitória Liverpool nian hasoru Tottenham.

 

 

Foto: PETER POWELL / EPA

Balotelli marka golu vitória.

 

Ohin dadeer Liverpool manán Tottenham 3-2, iha jogu Premier League ne’ebé hala’o iha Anfield. Mario Balotelli maka sai erói hosi "reds", hodi marka golu vitória nian iha minutu 83.

Ekipa uma nain maka hahú marka golu iha minutu 15 hosi intermédiu eis-benfikista Markovic, ne’ebé remata ho ain-karuk iha Hugo Lloris. Iha minutu 26', Harry Kane halo empata ho pasa hosi Lamela.

2-1 hosi intermédiu Steven Gerrard, hafoin marka penalidade, molok Dembelé halo empata fali ba "spurs" iha minutu 61'.

Golu vitória ne’ebé akontese iha minutu 83', ho erói improvável: Mario Balotelli, maka tama iha minutu 74' ba Sturridge nia fatin, hodi xuta tama ba baliza laran hafoin halo kruzamentu di’ak ida hosi Lallana no fó vitória ne’ebé "reds" nia heian hela.

Ho vitória ida ne’e, Liverpool mantén ninia pozisaun da-7, agora ho ponutu 42, maibé besik Tottenham, ne’ebé iha pontu 43.

Iha jogu sira seluk ne’ebé hala’o iha loron-Tersa,  Arsenal  manán Leicester 2-1, Hull City halakon Aston Villa 2-0  no QPR ba Sunderland nia kampo hodi manán 2-0.

 

Jogu ba 25 hosi  Premier League remata iha loron-Kuarta, sai hanesan destake jogu Chelsea-Everton, Stoke City-Manchester CIty no Manchester United-Burnley.

 

SAPO TL ho SAPO Desporto

tags: