Akademia Benfica nian iha Xina hahú iha semana ne'e

Instituisaun ne'e destinadu ba labarik no adolesente sira no iha akompañamentu hosi treinadór sira Benfica nian, entre sira maka diretór tékniku ida.


 

Sport Lisboa e Benfica loke ona iha semana ne'e nia akademia futeból dahuluk iha Xina, nebe sei hanorin ba joven lokál sira "filozofia ida nebe uza iha joven sira hosi klube ne'e" iha Portugal.

 

"Hanesan nasaun emerjente ida iha futeból, Xina hakarak hetan konseitu no métodu efetivu sira treinu nian", afirma ona iha komunikadu nebe diretór-jerál hosi sentru estájiu Benfica nian iha Seixal, Nuno Gomes, haruka ba Lusa.

 

"To'o tinan ne'e nia rohan sei iha tan parseiru iha Ázia", hatete hosi antigu internasionál portugés, nebe kontratadu tinan ne'e hodi jere eskalaun sira iha formasaun Benfica nian.

 

Hanesan instituisaun privadu ida, nebe destinadu ba labarik no adolesente sira, no iha akompañamentu hosi treinadór sira Benfica nian, entre sira maka diretór tékniku ida.

 

Ho alunu na'in 300 nebe maka tau ona naran, eskola futeból nebe funsiona hamutuk ho parseiru lokál ida, implementa iha Hangzhou, kapitál ida nebe prósperu iha provínsia Zhejiang, iha kosta leste Xina nian.

 

 

Inisiativu hosi atuál kampeaun portugés akontese ho interese ida nebe aumenta hosi públiku no governu Xina nian ba futeból.

 

Iha 2014, nasaun aziátiku lansa ona "planu ida reforma globál futeból nian", nebe determina, iha medida sira seluk, inkluzaun hosi modalidade hanesan komponente obrigatóriu hosi disiplina Edukasuan Fízika iha eskola primáriu no sekundáriu hamutuk 50.000.

 

"Iha-ne'e, iha investimentu boot ida iha futeból. Ne'e aumenta maka'as tebes", afirma hosi tékniku portugés ida, nebe hahú iha fulan haat liubá diriji eskola ida modalidade nian, iha sidade xineza ida Kantaun nian.

 

Lisensiadu iha Desportu iha Universidade Luzófonu no ho tinan 15 esperiénsia hanesan formadór, João Nunes to'o ona iha Xina ba dala uluk hodi fó treinu iha Winning League/Figo Football Academy.

 

Akademia futeból ho naran hosi antigu kapitaun selesaun portugés nian hahú ona iha 2014 no implementa ona iha sidade xineza hamutuk 14, fó serbisu ba treinadór portugés sira hamutuk na'in 45.

 

"Mehi xinés" ba futeból, motivadu hosi Prezidente Xi Jinping, iha etapa tolu: kualifika ba faze finál Mundiál nian, organiza Mundiál ida, no bele mana'an Mundiál ida, nebe hanesan mehi ida nebe nunka hetan hosi nasaun aziátiku ida ne'e.

 

Hanesan objetivu sira nebe konfiante tebes ba nasaun ida nebe iha fatin 81 iha ranking FIFA nian no nia partisipasaun iha Mundiál sira rezumu iha edisaun 2002, nebe hala'o iha Koreia-Súl no Japaun.

 

Iha tempu ne'ebá, selesaun xineza lakon jogu tolu nebe nia halo no la konsege hatama golu ida.

 

@SAPO Desporto