Jogadór timoroan sira tama kadeia tanba kombina rezultadu futeból iha Singapura

Jogadór timoroan na’in rua kondenadu ba pena fulan 20 no 24 kadeia tanba halo parte iha konspirasaun ne’ebé pretende kombina rezultadu jogu futeból iha Southeast Asian (SEA) Games edisaun tinan ne’e nian.


 

Orlando Marque Henriques Mendes, tinan 49, no Moisés Natalino de Jesus, tinan 31, kondenadu respetivamente ba prizaun fulan 24 no 20 tanba partisipasaun iha "konspirasaun kriminoza".

 

Primeiru kondenadu ho multa dólar Singapura rihun, besik euro 655.

 

Desizaun tribunál nian fó sai horisehik, oras 24 hafoin timoroan sira fila fali ba deklarasaun inisiál, hodi deklara halo sala no partisipa iha kazu ne’e.

 

Orlando, ne’ebé uluk hanesan diretór tékniku Associação de Futebol de Timor-Leste, no timoroan ida seluk hetan akuzasaun aseita subornu hodi oferese ba jogadór sira hosi ekipa futeból Timor-Leste nian,  atu halakon jogu ho Malázia iha loron 30 maiu liubá.

 

Investigasaun kondús hosi Corrupt Practices Investigation Bureau (CPIB) ne’ebé detein timoroan na’in rua ne’e no sira-nia kokonspiradór sira, indonéziu Nasiruddin no singapuraoan Rajendran R Kurusamy molok hala’o jogu, ne’ebé termina 1-0 ba Malázia.

 

Nasiruddin no Rajendran – konsideradu iha tribunál hanesan responsável boot tanba kombina rezultadu jogu nian (match-fixing) Singapura nian - deklaradu ona halo sala iha nia julgamentu, no kondenadu, respetivamente, fulan prizaun 30 no 48.

 

Iha komunikadu CPIB subliña katak Singapura adota "polítika zero toleránsia relasiona ho korrupsaun no visiasaun ba rezultadu sira, ne’ebé la iha toleránsia iha kualkér forma".

 

"CPIB la iha dúvida hodi foti medida kontra kualkér parte mak envolve iha atividade sira ne’ebé relasiona ho manipulasaun rezultadu", refere komunikadu ne’e.

 

SAPO TL ho Lusa