Cristiano Ronaldo admiti husik Real Madrid

Internasionál portugés rekua iha vontade hodi hakotu nia kareira iha Madrid.


 

Kontinuidade hosi Cristiano Ronaldo iha Real Madrid la'ós metin no internasionál portugés ne'e rasik maka admiti ona iha entrevista ida ba revista alemaun Kicker.

 

Maski afirma tiha ona katak hakarak hakotu nia kareira iha emblema españól bainhira simu tiha Bota Osan-Mean ba dala haat, Cristiano Ronaldo agora hatete senáriu seluk iha nia futuru, katak sei husik Real Madrid antes hakotu nia kareira.

 

"Loron ida husik Real Madrid? Tansá maka la'e? Agora daudaun ha'u joga hosi Real, maibé ita nunka hatene. Ó tenki halo buat nebe halo ó haksolok. Saida maka sei akontese aban? Ema ida la hatene", Cristiano Ronaldo afirma ba publikasaun alemaun ne'e.

 

Kona-bá kestaun jogadór di'ak liu iha mundu, jogadór hosi Real Madrid hatete katak iha nia neon maka nia nafatin, maski admiti eskolla sira seluk hanesan Messi ka Iniesta.

 

"Karik ba ita maka Messi, ba ema sira seluk maka Iniesta... Ha'u respeita, maibé iha ha'u nia neon ha'u maka di'ak liu", Cristiano Ronaldo hatete kona-bá sé maka sei sai johadór di'ak liu iha mundu.

 

Cristiano Ronaldo nia afirmasaun sira ne'e konfirma ona informasaun sira nebe mosu hosi imprensa ingleza, franseza no katalaun katak internasionál portugés hakarak sai hosi Real Madrid hodi ba Paris Saint-Germain ka ba Manchester United.

 

@SAPO Desporto