Mourinho: "Ha’u sente presaun iha Benfica"

Treinadór portugés dehan katak lasente ona presaun atu manan hanesan saida maka akontese bainhira hahú ninia kareira iha Benfica no FC Porto.


José Mourinho kontinua konfia-an ho ninia kapasidade. Treinadór ne’e dehan katak lasente ona presaun atu manan, hanesan saida maka akontese bainhira hahú ninia kareira iha Benfica nomós FC Porto.

 

"Bainhira hahú ha’u-nia kareira iha Benfica, hanesan buat ne’ebé naturál katak mosu dúvida balun kona-ba ha’u-nia valór, nune’e mos bainhira tama ba FC Porto, molok manan ha’u-nia títulu dahuluk. Mosu dúvida ba sira ne’ebé lahatene, nomós presaun balun”, dehan Mourinho no sita hosi ´Irish Times`.

 

Treinadór Chelsea ne’e dehan katak nia maka fó presaun ba nia-an no dehan katak la’os atu hamosu pergunta ba ninia kapasidade.

 

"Oras ne’e daudaun, presaun ne’ebé ha’u sente maka iha ha’u-aan rasik. Ha’u koñese mundu no koñese mundu futeból, ema hotu hein kona-ba momentu negativu, los duni sira maka faan. Maibé, ha’u dehan klaru katak, molok ne’e ha’u lasente presaun nune’e. Agora ha’u iha istória, istória bot ida. Ha’u lasimu bainhira kria problema tanba de’it haree ba ha’u-nia kbi’it nu’udar treinadór, no fó rezultadu ne’ebé ladi’ak”, hatutan.

 

SAPO TL ho SAPO Desportu