PM autoriza IJE investiga jogadór brasileiru ne’ebé tama ba iha selesaun timor-oan nian

Primeiru Ministru Rui Maria de Araújo fó autorizasaun ba Inspesaun Jerál Estadu (IJE) atu investiga jogadór brazileiru-oan sira ne’ebé halo parte iha selesaun timor-oan nian, tuir informasaun hosi jornál Suara Timor Lorosa’e.



 

“Jogadór na’in hitu ne’ebé ho nasionalidade brazileiru ne’ebé oras ne’e daudaun halo parte iha selesaun timor-oan nian, sai ona hanesan polémika bot ba komunidade, tanba ne’e maka ha’u fó autorizasaun ba Inspesaun Jerál Estadu atu halo investigasaun ida ba sira, atu nune’e ita bele hatene, karik sira iha ona dokumentu legál ne’ebé hatudu katak sira timor-oan duni”, dehan xefe Governu hafoin halo tiha vizita surpreza bá iha edifísiu Diresaun Nasionál Rejistu Notariadu, iha Kolmera, horisehik.

 

Iha parte seluk diretora Nasionál ba Rejistu Notariadu, Maria do Rosário Fátima Castro Araújo fó sai katak jogadór na’in hitu ne’e iha ona pasaporte Timór, maski sira moris iha Brazil no tanba sira-ninia inan-aman no avó sira moris iha Timor-Leste, maka sira iha direitu atu hetan pasaporte ne’e.

 

SAPO TL ho STL