Timor-Leste lakon ho Malázia no tuun ba fatin ikus iha grupu aziátiku nian

Iha loron-tersa ne'e Timor-Leste lakon ho Malázia ho 1-0, iha jogu nebe halo iha Timor-Leste ba kualifikasaun Mundial2018 nian, nune'e Timor-Leste tuun ba fatin ikus iha Grupu A nian hosi kualifikasaun aziátiku, ho pontu rua de'it iha jogu lima.


 

Mohd Amri, avansadu hosi klube malaiu Johor Darul Ta'zim, hahú marka iha minutu sia, ho golu kabesa nian, hafoin atake ida hosi Malázia, nebe tama iha jogu ne'e ho krítika maka'as hafoin troka tiha treinadór tanba rezultadu sira nebe ladi'ak.

 

Timor-Leste nebe tinan ne'e uza jogadór sira ho naturalidade brazileiru la konsege halakon ekipa nebe, to'o agora, hanesan selesaun fraku liu hosi nia grupu no nebe sofre liu golu barak.

 

Maski ho presaun hosi parte rua, parte dahuluk hosi jogu hotu lahó okaziaun sira golu nian, maibé ho saldu disiplinár ida nebe "todan liu" ba Timor-Leste: kartaun amarelu rua, inklui ida ba Adé, tanba halo falta hasoru guarda-rede malaiu, kontra amarelu ida ba malaiu Mohd Safee.

 

Iha parte daruak, Timor-Leste tama ho presaun maka'as, ho atake oioin no situasaun balun nebe perigu iha baliza Khairul Fahmi nian, maibé la konsege hatama golu ruma.

 

Selesaun timoroan to'o iha enkontru ne'e ho lakon rua no empate rua - ida maka hasoru Malázia - bainhira selesaun malaiu akumula empate ida no lakon dala tolu, ida maka akontese ho Emiradu Árabe Unidu ho 10-0.

 

Timor-Leste agora iha fatin ikus grupu nian, ho pontu rua, iha Malázia nia kotuk nebe hetan pontu haat, ekipa rua ne'e sei iha jogu dala ida tan.

 

Grupu ne'e lidera hosi Arábia Saudita, ho pontu 12, tuir Emiradu Árabe Unidu ho pontu hitu no Palestina ho pontu lima, sira hotu ho jogu haat.

 

Enkontru tuirmai Timor-Leste nian sei hala'o iha loron 12 fulan-Novembru hasoru Emiradu Árabe Unidu, tuir sei hasoru Arábia saudita iha loron 17 fulan-Novembru no, ikusmai, deslokasaun ba Palestinaa nebe previstu de'it iha fulan-Marsu 2016.

 

ho Lusa