Timor-Leste fi’ar katak sei manan Palestina iha kualifikasaun ba Mundiál 2018

Visi-treinadór hosi selesaun timor-oan nian, Filomeno Fernandes konsidera katak fatór hosi kampo bele halo ekipa ne’e lakon durante jogu kontra Palestina, aban, iha jogu hosi grupu A ba kualifikasaun Mundiál 2018.


 

Durante enkontru, Filomeno Fernandes haktuir ba Lusa katak nia otimista ho enkontru refere, no hakarak tebes atu Timor-Leste manan iha jogu kualifikasaun ba Mundiál.

 

“Joga iha kampo rasik, bele hetan apoiu barak no ami hakarak atu buat hotu la’o ho di’ak”, dehan.

 

“Ami fi’ar katak ami-ninia jogadór sira haksolok tanba bele joga iha sira-ninia kampo. No jogu sira hanesan ne’e di’ak atu bele estimula prosesu harii liga profesionál iha Timor-Leste”, hatutan tan.

 

Timor-Leste ho Palestina, inklui Arábia Saudita, Emirados Árabes Unidus (EAU) ho Malázia, maka hanesan grupu A hosi rinda daruak ba kualifikasaun Mundiál 2018.

 

EAU maka lidera grupu ne’e ho pontu hitu ba iha jogu tolu, tuir maka Arábia Saudita ho pontu neen, maibé menus jogu ida, tuir maka Palestina ho pontu haat ba iha jogu tolu no Timor-Leste ho Malázia ho de’it pontu idaida, maski nune’e timor-oan sira hetan vantajen tanba diferensa golu.

 

Filomeno Fernandes dehan katak ekipa timor-oan nian “ halo preparasaun barak", tanba aproveita partisipasaun hosi jogadór hirak ne’ebé iha ona esperiénsia internasionál.

 

"Ami-ninia preokupasaun maka ezizénsia hosi FIFA nian katak ema hotu tenke tur maka asisti jogu ne’e. Maibé ami laiha bankada ba ema hotu. Ami tenke respeita, maibé bele mos ladi’ak ba timor-oan hotu", dehan.

 

Abdal Nasser Barakat, treinadór hosi selesaun Palestina, dehan ba Lusa katak selesaun timor-oan nian “di’ak tebes”, maski sira-ninia ranking, hatudu kapasidade bot “atu sai di’ak liu tan iha tempu oin mai”.

 

 

 

“Ami haree ona ekipa timor-oan sira ne’e iha enkontru ikus. Hanesan ekipa di’ak ida. Ekipa ne’e ho jogadór profesionál, ne’ebé joga ona iha nasaun seluk, iha Emiradu, Tailándia no Brazil, no ida ne’e fó ona esperiénsia ba sira”, dehan.

 

“Maski nune’e ami mos hakarak apoia sira. Ida ne’e hanesan jogu dahuluk ne’ebé hala’o iha kampo timor-oan nian. Ami hakarak hato’o parabéns ba Timór no agradese ba sira-ninia ospitalidade ne’ebé di’ak”, hatutan tan treinadór Palestina.

 

Kona-ba aspirasaun hosi sira-ninia ekipa rasik, treinadór Palestina nian ne’e dehan katak ekipa ne’e mos hasoru difikuldade, maibé “metin” no konsege ultrapasa obstákulu hothotu. Husu kona-ba polémika ne’ebé kria hosi pozisaun Arábia Saudita, hodi lakohi bá joga iha Palestina, relasiona ho ronda kualifikasaun ne’e, treinadór hatan katak “hanesan direitu ida” hosi palestina-oan sira.

 

“Kada ekipa iha ninia pozisaun no ida ne’e ami-nian. Hothotu hakarak iha poder hodi joga iha sira-ninia nasaun rasik, tanba ne’e fó vantajen no ami mos hanesan. Ami hakarak joga iha ami-nia kampo rasik, tanba ne’e ami-ninia direitu”, dehan.

 

Molok mai joga iha ne’e, selesaun Palestina manan ona Malázia 6-0, empata dala ida ho Malázia 0-0 no lakon dala ida kontra Arábia Saudita ho 3-2. Timor-Leste empata 1-1 ho Malázia, lakon dala rua 0-1 ho EAU no 7-0 ho Arábia Saudita.

 

Selesaun timor-oan nian sei joga hikas iha Estádiu Munisipál Dili, hasoru selesaun Malázia, loron 13-outubru.

 

SAPO TL ho Lusa