FIFA fó lakon ba Malázia hafoin insidente sira iha jogu ho Arábia Saudita

Enkontru ho Arábia Saudita tuir lakon invulgár sira ho Palestina (6-0) no Emiradu Árabe Unidu (10-0).


Foto @AFP

 

Iha loron-segunda ne'e FIFA desidi fó lakon ba Malázia iha enkontru loron 08 fulan-Setembru ho Arábia Saudita, interompe iha minutu 88, hafoin adeptu malaiu ida so'e toxa ba kampu laran, halo estádiu nakonu ho suar.

 

Hodi hasoru insidente sira ne'e, organizmu nebe kaer futeból mundiál fó lakon ida ho 3-0 ba selesaun malaiu, nebe iha jogu tuirmai sei joga ho odamatan metin, hasoru Emiradu Árabe Unidu, hosi faze daruak Grupu A hosi kualifikasaun aziátiku ba Mundiál2018, no tenki selu mós multa ida ho euro 36.600 resin.

 

Iha jogu loron 08 fulan-Setembru, ho rezultadu 2-1 favór ba saudita sira, iha minutu 88, adeptu sira malaiu nian hahú so'e objetu sira ba kampu, iha mós ligasaun ho frustasaun hosi lakon 10-0 nebe sira hetan iha semana ida antes hasoru Emiradu Árabe Unidu.

 

"Ultra" malaiu sira halo kampu nakonu ho suar, halo jogadór no responsável sira hosi selesaun rua ne'e tenki tama iha balneáriu, akompaña hosi polísia.

 

Oras balun antes, selesionadór interinu hosi Malázia, Ong Kim Swee, husu tiha ona ba adeptu sira atu labele halo perturbasaun iha jogu ho Arábia Saudita.

 

Enkontru ho Arábia Saudita no tuir lakon invulgár sira ho Palestina (6-0) no Emiradu Árabe Unidu (10-0) maka halo treinadór Dollah Salleh sai hosi komando tékniku selesaun nian.

 

@SAPO Desporto