Qatar hakarak kontratu eletróniku sira ba estranjeiru sira

Nasaun ne'e simu nafatin krítika tanba laiha respeitu ba kondisaun sira traballadór nian.


AFP@ Karim Jaafar

 

Qatar, nasaun organizadór hosi Mundiál Futeból tinan 2022, fó sai iha loron-kuarta katak iha planu hodi hatama sistema ida kontratu eletróniku nian ba traballadór estranjeiru sira, iha tinan oinmai.

 

Nasaun ne'e hetan nafatin krítika tanba kondisaun sira serbisu nian nebe oferese ba ema estranjeiru sira, no hetan akuzasaun tanba la respeita sira nia direitu, no hakarak nune'e sistema foun "hodi tulun traballadór".

 

Tuir Mohammed Ali Al Meer, xefe hosi relasaun sosiál iha ministériu traballu hosi emiradu, sistema sei hala'o "iha trimestre dahuluk 2016" nian no permiti ba traballadór sira hodi "hatene sira nia direitu".

 

Ho sistema foun, migrante sira sei bele tama iha site ofisiál governu nian iha internet no fó informasaun pesoál sira hodi bele le, iha sira nia lian rasik, termu sira kontratu nian.

 

Ba dala uluk serbisu ne'e sei disponivel iha lian 10, nebe sei halo traballadór sira bele le, ba dala uluk, buat nebe sira asina tiha ona, tanba kontratu barak maka hakerek de'it iha lian árabe no lian inglés.

 

Iha istória oioin nebe akontese iha Doha, emiradu nia kapitál, kona-bá oinsá traballador balun ema lohi.

 

Ema ganes ida naran Hassan hatete foin lalais ne'e ba ajénsia France Presse katak nia asina tiha kontratu ida nebe hatete pagamentu ba dolár 900 fulan-fulan, maibé bainhira nia to'o iha nasaun nia hatene katak nia saláriu maka reál katarense 900 (euro 220 resin).

 

"Bainhira traballadór ida asina ona kontratu ida ho empreza ida, hanesan ezemplu dolár 800 fulan-fulan no, bainhira to'o iha ne'e simu de'it dolár 700, ministériu sei peskiza kazu ne'e", afirma hosi Al Meer.

 

Projetu ba kontratu eletróniku sei la hanesan obrigatóriu, maibé Al Meer fiar katak empreza barak sei implementa sistema ne'e.

 

Tuir funsionáriu sira nasaun nian medida ne'e halo parte hosi pakote jerál ida hosi reforma sira nebe hakarak halo mós ba sistema protesaun saláriu nian iha fulan-Novembru, hodi bele hatama alterasaun sira iha "lei kafala" nebe limita kuantidade traballadór estranjeiru sira iha emiradu.

 

Alterasaun sira ne'e karik sei hala'o iha tinan ne'e nia rohan.

 

Karik ba preparasaun mundiál iha Qatar ne'e iha ema estranjeiru millaun 1,7 resin maka serbisu iha nasaun ne'e, númeru ida nebe bele aumenta ba millaun rua to'o tinan 2020.

 

@SAPO Desporto