Hafoin liu tiha fulan hitu ho balun, 'Depor' manán fila fali iha ema nia uma

Ekipa galega halakon Rayo Vallecano 3-1. Luisinho tama iha minutu 64.



Foto: Luca Piergiovanni / EPA

Deportivo hetan ona pontu lima.

 

Horisehik Deportivo manán Rayo Vallecano 3-1 iha Rayo nia uma, jogu ne’ebé taka terseira jornada hosi Liga española futeból, no sa’e ba pozisaun dahitu iha tabela klasifikativa.


Ekipa galega halo ‘jejum’ ida durante fulan hitu ho balun nunka manán bainhira joga iha ema nia uma no haksoit hosi pozisaun 14 ba pozisaun hitu, liu fali Valência, ne’ebé maka iha oitavu lugár ho pontu hanesan, pontu lima.

 

Vitória  ‘Depor’ komesa iha minutu hitu, bainhira Celso Borges, médiu Costa Rica, loke markadór, maibé Rayo Vallecano restabelese igualdade iha minutu 27, liuhosi Adri Embarba.

 

Resposta ekipa Corunha hein no hafoin liu tiha minutu ida Luís Alberto koloka hikas fali Deportivo iha markadór, vantajen ne’e konsolidada segunda parte ho terseiru golu ba Lucas Pérez, iha minutu 61.

 

Rayo Vallecano joga menus unidade ida hosi minutu 77, bainhira médiu alemaun Patrick Ebert hetan segundu kartaun kinur ninian.

 

Portugés Bebé no Zé Castro la konsege aliña Rayo Vallecano, primeiru tanba opsaun téknika no tuir fali tanba lezaun. Hosi Deportivo, iha portugés ida maka halo asaun, eis-benfikista Luisinho, ne’ebé tama iha kampo iha minutu 64, hodi halo Luís Alberto rende.


Ho vitória ida ne’e Deportivo hetan pontu lima, hodi sai sétimu lugár, enkuantu Rayo Vallecano maka sai penúltimu, iha 19º lugár, ho pontu ida de’it.

 

Jornada ne’e marka ho vitória hosi FC Barcelona iha Vicente Calderón, 2-1, hasoru Atlético Madrid no golu lima hosi Cristiano Ronaldo iha Catalunha, hasoru Espanyol, hodi manán 6-0.

 

FC Barcelona lidera kampeonatu ho pontu sia, liu pontu rua duke kuartetu formadu hosi Real Madrid, Celta, Villarreal no Eibar.

 

SAPO TL ho SAPO Desportu