Federasaun siklizmu Portugal no Timor-Leste asina protokolu

Federasaun rua ne’e sei halo divulgasaun eventu ne’ebé sei hala’o iha nasaun rua ne’e, hodi promove mós interkámbiu atleta no tékniku sira.

 


Foto: JOÃO RELVAS / LUSA
Delmino Pereira, prezidente Federasaun Portuguesa de Ciclismo.


Federasaun Portugeza Siklizmu (FPC) no Federasaun Siklizmu Timor-Leste horisehik asina protokolu kooperasaun nian ida ho objetivu atu dezenvolve modalidade iha país rua ne’e, ne’ebé maka hein hela mós interkámbiu hosi atleta sira.


Objetivu hosi akordu kooperasaun entre estadu Portugal no Timor-Leste, federasaun rua ne’e asina akordu ida, ne’ebé nasaun rua ne’e sei halo divulgasaun eventu sira ne’ebé hala’o iha nasaun rua ne’e, promove mós interkámbiu atleta no tékniku.


Iha faze projetu inisiál, FPC sei asumi papel ida ne’ebé ativu liu iha Timor-Leste, ne’ebé sai hanesan responsabilidade prinsipál ba implementasaun regra modalidade, kria estrutura no formasaun tékniku no atleta timoroan sira.


Serimónia, ne’ebé hala’o iha Museu Nacional do Desporto, hetan prezensa hosi prezidente federasaun rua nian no hosi sekretáriu Estado do Desporto e Juventude hosi nasaun rua ne’e, governante portugés, Emídio Guerreiro, sente kontente tebes ho selebrasaun protokolu, ne’ebé sai hanesan oinsa "bele sai hosi papel ba prátika".


"Ida ne’e maka hanesan sasin di’ak ida oinsá ema bele sai hosi papel ba prátika no ha’u hein katak ho lalais ita iha joven timoroan sira hodi bele hean bizikleta iha Portugal no ekipa téknika ida bele ba iha Timor hodi ajuda. Ita-nia povu rua ne’e iha buat barak komum no presiza kria hikas buat ne’ebé ladauk halo iha iha pasadu hodi halo iha futuru", afirma.


Leovigildo Hornai, sekretáriu Estadu timoroan, destaka kona-ba esforsu ne’ebé halo tiha iha "reabilitasaun infraestrutura iha país", sei lahaluha papel desportivu, ne’ebé hatudu expetante iha eventuál rezultadu ekipa nasionál nian.


"Desportu maka ferramenta di’ak liu ba dezenvolve sosiedade. Timor - Leste halo esforsu boot ida ba dezenvolve desportu tantu iha nível nasionál liuhosi reabilitasaun infraestrutura iha país. Ami mós hein katak konsolidasaun hosi ita-nia ekipa nasionál, liuhosi entidade nasionál ida ne’ebé forte", esplika.


Timor - Leste mós marka prezensa hosi Ângelo Henriques, prezidente Federasaun Siklizmu nasaun nian, ne’ebé nia mós sente satisfeitu akordu ne’ebé halo, nune’e bele "fó suporta ba tempu oin mai nune’e ita bele evolui", liuhosi apoiu Portugal nian, país ne’ebé konsidera "nu’udar maun ho alin ne’ebé kleur ona".


"Ami sei serbisu hamutuk hodi hadi’a Federasaun Timor. Akordu ida ne’e lafásil maibé ho esforsu maka’as ba entidade hotu-hotu ita konsege. Akordu ida ne’e sei ajuda ita, fó suporta ba atu nune’e ita bele evolui. Ita husu apoiu ba Portugal tanba sai ona hanesan maun ho alin kleur ona ita nunka bele haluha ", tenik.
Prezidente FPC, Delmino Pereira, asumi katak iha "ba oin sei iha serbisu barak atu halo", esplika katak protokolu hatur iha " eixu dezenvolvimentu tolu".


"[Horisehik] hanesan loron furak ida ba ita-nia istória. Ba oin ita iha serbisu barak atu halo. Protokolu ne’e hatúr iha eixo dezenvolvimentu tolu ne’ebé apoiu hosi preparasaun hosi selesaun rua, promosaun eventu internasionál sira no formasaun tékniku, árbitru no treinadór, ne’ebé sai sai útel tebes ba Timor nia dezenvolvimentu", konklui.


SAPO TL ho SAPO Desporto