Manifestante sira hakarak reforma no mudansa iha Federasaun Futebol Timor-Leste nian

Grupu manifestante ida, ne'ebé identifika nu’udar "amante" futebol nian iha Timor-Leste, iha loron-sesta ne’e halo protestu ba loron haat konsekutivu hasoru Federasaun Futebol Timor-Leste nian (FFTL), ne'ebé akuza korupsaun no iregularidade.



 

José de Carvalho, ne'ebé uluk nu’udar treinadór ba ekipa sub-19 no sub-23, iha tinan 2006 ho 2007 no afirma nu’udar "koordenador ba movimentu" ba protestu ne'e, akuza diresaun FFTL ba "iregularidade oioin", konsidera katak "viola lejislasaun no regulamentasaun FIFA nian".

 

Iha jogador balun ho tolu ka haat Timor-Leste nian no ho tinan nebe la hanesan. Naran hanesan, jogador hanesan maibé idade la hanesan. Halo ida ne'e hodi bele hetan jogador hodi kompete iha kompetisaun oioin", nia afirma.

 

"Laiha liga nasionál. Iha jogu balun, maibé laiha liga hahú tinan 2007. Sira halo liga ne'e hodi kumpri de'it ezijénsia hosi FIFA. Maibé ne'e la hotu tan. Ema hakarak liga ida. Iha tempu Indonéziu nian ami iha ekipa", nia afirma.

 

Iha tempu hanesan, nia insiste katak iha tinan 7 nia laran maka laiha kongresu ida hodi hili fila fali diresaun FFTL nian, kontesta ba prosesu "falsu no iregulár" ba naturalizasaun jogadór brazileiru sira ba selesaun nasionál (agora daudaun iha na'in hitu, tuir FFTL).

 

João Neves, manifestante seluk, esplika ba ajénsia Lusa katak krítika sira hasoru naturalizasaun jogador sira "la’ós tanba rasizmu", maibé tanba violasaun sira hosi kritériu ba prosesu ne'e.

 

“Sidadaun ruma ne'ebé hakarak iha nasionalidade timoroan bele halo. Naran katak kumpri kritériu. Brazileiru sira mai iha ne’e hodi sai koñesidu de’it no hodi hetan koñesimentu hosi ekipa sira iha Ázia. Sira la joga iha sira nia nasaun", nia afirma.

 

Joaquim Vide, uluk jogadór federadu iha Portugal, partisipa mós iha manifestasaun ne'e, esplika katak iha tinan barak maka futebol iha falta apoiu adekuadu hosi parte FFTL.

 

"Ami laiha klube loloos sira hodi harii asosiasaun sira no laiha asosiasaun di’ak sira hodi harii federasaun. Asosiasaun sira ne'ebé eziste iha ne'e hanesan hatudu imajen de'it", nia afirma.

 

Joaquim Vide reforsa liu tan katak dirijente sira FFTL nian "lidera tempu barak ona, tenki halo eleisaun no fó oportunidade ba ema seluk ne'ebé iha projetu di'ak, ne'ebé hakarak halo buat ruma". Maski selesasun nasionál "joga di'ak tebes", nia insiste katak problema maka iregularidade.

 

"Jogador to'o iha loron-kuarta, iha loron-sesta hetan pasaporte no aranka iha loron-sábadu. Iha jogador sira ne'ebé inskritu iha klube sira iha nebe maka la eziste no la joga", nia akuza. Osório Florindo, visi-prezidente FFTL, rejeita ona, iha entrevista ba Lusa, akuzasaun hosi manifestante sira, insisti katak atu hahú liga nasionál ida, sosiedade sivil tenki harii klube sira no depois iha infraestrutura sira nebe adekuadu.

 

"Ami preokupa mós ho situasaun ne'e. Maibé preparasaun hosi klube sira la kompete ba FFTL. Bainhira ita ko'alia kona-bá liga profisional, tenki iha kritériu sira, apoiu, infraestrutura sira. Ita seidauk iha ida ne'e. No sosiedade sivil maka tenki halo ida ne'e no karik sira ladún iha interese ba asuntu ne’e", nia konsidera.

 

Osório Florindo konsidera katak "iha komprensaun nebe la loos kona-bá papél Federasaun", tanba la kompete ba organizmu hodi “harii klube sira”.

Dirijente insiste katak hanoin ona kongresu FFTL ida ba fulan-Setembru no rejeita akuzasaun sira ba korupsaun hasoru diresaun, nia afirma katak kazu sira akontese daudaun iha Singapura- bainhira kaer diretor tékniku FFTL nian no timoroan na’in ida seluk tanba alegasaun tenta kombina rezultadu - ne'e hanesan pontual no la abranje ema sira hotu.

 

"Ami la’ós koruptu. Krimi sira ne'e hanesan responsabilidade individuál. Ka membru na’in ida hosi Governu nian maka koruptu ita bele dehan sira hotu kedas? FFTL la proteje ema ida nebe maka hetan akuzasaun ba krimi sira ne’e”, nia afirma.

 

Kona-bá naturalizasaun hosi jogadór brazileiru sira, Osório FLorindo hatete katak "ida ne'e akontese iha mundu tomak" no prosesu sira tuir nafatin lei, no "laiha iregularidade ruma".

 

ho Lusa