Akuzasaun adisionál sira hasoru timoroan sira nebe hetan kaer iha Southeast Asian (SEA) Games

Autoridade sira iha Singapura formaliza ona akuzasaun adisionál sira, ba konspirasaun kriminozu no subornu, hasoru ema na'in haat, inklui timoroan na'in rua, nebe suspeitu kombina rezultadu hosi jogu futeból entre Malázia ho Timor-Leste iha Southeast Asian (SEA) Games.


Ema sira hetan kaer hanesan ema hosi Singapura Rajendran R. Kurusamy, ho tinan 55, timoroan sira hanesan Orlando Marques Henriques Mendes, ho tinan 49, ho Moises Natalino De Jesus, tinan 32 no ema indonéziu na'in ida Nasiruddin ho tinan 52.

Mendes hanesan diretór tékniku hosi Federasaun Futeból Timor-Leste nian no Natalino de Jesus hanesan eis-jogadór ida hosi selesaun timoroan nian.

Antes, Rajendran hetan akuzasaun tanba halo subornu ba timoroan na'in rua ho osan dolár rihun 15 hodi nune'e selesaun sub-23 Timor-Leste nian lakon hasoru Malázia iha jogu loron-sábadu ba SEA Games.

Autoridade sira aumenta ona akuzasaun hasoru Rajendram no Orlando Mendes, nebe agora hetan mós akuzasaun ba konspirasaun hodi fó osan ba pelumenus jogadór timoroan na'in hitu hodi lakon jogu hasoru Malázia.

Natalino de Jesus no Nasiruddin hetan mós akuzasaun iha loron-segunda ne'e ba konspirasaun tanba halo akordu hodi fó osan ba jogadór sira hosi selesaun timoroan nian.

Akuzasaun husu ona atu ema sira ne'e hela iha prizaun preventivu, lahó fiansa, tanba defeza argumenta favór ba fiansa, liuliu ba Rajendran nebe hatete katak nia moras.

Iha loron 07 fulan-Juñu 2015, Timor-Leste lakon ona iha jogu, nebe halo iha Bishan Stadium ba Southeast Asian (SEA) Games, hasoru Vietnam ho 0-4. Jogu foun sei halo iha estádiu hanesan iha loron 09 fulan-Juñu 2015 hasoru Laos.

ho Lusa